Azərbaycanın tanınmış güləşçilərindən olan Rəsul Çunayev başqa ölkənin bayrağı altında mübarizə aparmaq istəyir. Yunan-Roma güləşi üzrə 2015-ci il Dünya Çempionu, 2016-cı il Olimpiya Oyunlarının bürünc mükafatçısı və 2015-ci il Dünya Kubokunun qalibi müxtəlif ölkələrdən bir neçə təklif alıb.
YALAN.info bildirrir ki, idmançı bununla bağlı “CBC Sport” telekanalının “Bizim İdman” verilişində bildirib.
Azərbaycanlı güləşçi deyib: “Sonuncu dəfə Azərbaycan millisinin heyətində 2020-ci ildə Sofiyada keçirilən Olimpiadanın lisenziyalı turnirində çıxış etmişəm. Bu turnirdən sonra zədələrin müalicəsi ilə məşğul olmuşam. İndi xalçaya qayıtmaq, çıxış etmək və qalib gəlmək istəyirəm. Başa düşürəm ki, indi 77 kq-da millinin lideri Sənan Süleymanovdur və məşqçilər mənimlə hesablaşmırlar. Ancaq mən daha bir neçə il çıxış etmək üçün özümdə güc hiss edirəm. Avropa və Asiyanın bir neçə ölkəsi məni öz milli komandalarında döyüşməyə dəvət etdi.
Son vaxtlar mükəmməl variant seçmək üçün onların təkliflərini nəzərdən keçirirəm. Bəzi ölkələr hətta zədələrin müalicəsində də kömək etməyə hazırdırlar. Düşünmürəm ki, başqa ölkədə oynasam, vətənimə münasibətdə yanlış olar. Bir çox tanınmış pəhləvanlar öz komandalarına düşmədikdə, başqa dövlətlər üçün mübarizə aparırlar”.
“İndi mənim üçün çətindir, dolandırmalı olduğum ailəm var. Və buna görə də milli federasiya üçün problem olmasa, həmin ölkələrdən birini seçəcəyəm. Niyə Paris-2024 Olimpiadasına vəsiqə uğrunda mübarizə apararkən, döşəkdə Azərbaycandan olan biri ilə görüşməyək?” – deyə Çunayev vurğulayıb.
