Pentaqon Kramatorskdakı dəmiryol vağzalına raket hücumunun məhz Rusiya tərəfindən olduğunu təsdiqləyib.
YALAN.info bildirir ki, bununla bağlı aprelin 8-də jurnalistlər üçün keçirilən qapalı brifinqdə ABŞ Müdafiə Nazirliyinin yüksək rütbəli rəsmisi danışıb.
“Aydındır ki, biz rusiyalıların (bu raket hücumuna görə – Red.) cavabdeh olmamaları ilə bağlı etirazlarını qəbul etmədik. Onlar əvvəlcə uğurlu buraxılış barədə elan etdilər, ancaq nəticələr barədə məlumat verilən kimi bunu təkzib etdilər”, – deyə Pentaqondakı mənbə bildirib.
Pentaqon həmçinin hesab edir ki, Rusiya Kramatorska hücum üçün RF Silahlı Qüvvələrinin 2021-ci ildə yaradılan 18-ci motoatıcı diviziyasından istifadə edəcək. Diviziya üç motoatıcı alaydan və zirehli alaydan ibarətdir.
“Bizim dəyərləndirməmizə görə, diviziyadan qatar stansiyasına hücum edilən yerdə istifadə olunacaq”, – deyən Pentaqon rəsmisi bölmələrin bu ərazidə hərəkətinin müşahidə edildiyini vurğulayıb.
“Bu, Ukraynanın şərq hissəsinin əsas dəmiryolu qovşağıdır və çox strateji yerdir”, – deyə o, əlavə edib.
Yada salaq ki, aprelin 8-də Kramatorsk dəmiryolu vağzalına iki ədəd “Toçka-U” raketi atılıb. Həmin vaxt stansiyada təxliyə olunmağı gözləyən minlərlə insan olub. Son məlumatlara görə, raket hücumu nəticəsində azı 52 nəfər ölüb, 109 nəfər yaralanıb.
