Azərbaycanın qadın güləşçisi, ölkəmizin Olimpiya oyunlarındakı rekordçusu, 2 qat dünya, 8 qat Avropa çempionu olan Mariya Stadnik (50 kq) karyerasını davam etdirəcək.

YALAN.info Onlayn Xəbərlər və İnformasiya Saytı bildirir ki, bununla bağlı 33 yaşlı 2 uşaq anası titullu idmançımız Dünya Güləş Birliyinin rəsmi saytına açıqlama verib.

O, 2024-cü ildə Fransanın paytaxtı Parisdə keçiriləcək Yay Olimpiya Oyunlarında iştirak etmək istədiyini bildirib. 2 qat dünya və 8 qat Avropa çempionu bu qərarı Tokio Olimpiadasından qayıtdıqdan dərhal sonra qəbul edib: “Düşünürəm, nə qədər ki, döyüşmək istəyim var, bütün potensialımı gerçəkləşdirməyə məcburam. Ailəm və dostlarım mənə çox inanırlar. Oğlum güləşə davam etməyimi istəyir, çünki güclü olduğumu deyir”.

Stadnik Paris Olimpiadasına vəsiqə qazansa, ardıcıl 5 nüfuzlu yarışda iştirak etmiş yeganə güləşçi olacaq. O, qarşıdakı Oyunlarda da mükafatçı olmaq istəyini gizlətməyib: “Çox istərdim ki, beş olimpiya medalım olsun. Hər medal mənim həyat hekayəmin, səyahətimin bir parçasıdır. Beş olimpiya halqası var, ona görə də beş olimpiya medalına sahib olmaq tarixə düşəcək”.

Güləşçinin fikrincə, yaşına və fiziki durumuna görə öncəkitək tez-tez yarışlara qatıla bilməz: “İldə dörd, ya da beş turnirdə iştirak mənim üçün idealdır. Parisə getməzdən öncə qarşılaşa biləcəyim yeganə problem bədənimin məşqlərə necə reaksiya verəcəyini bilməməyimdir. 20 yaşımda olan enerjini kompensasiya etmək üçün düzgün yararlana biləcəyim müəyyən təcrübəm var”.

Yada salaq ki, Mariya Stadnik “Pekin-2008” və “Tokio-2020″də bürünc, “London-2012” və “Rio-2016″da isə gümüş medal qazanıb.

BİR CAVAB YAZ

Buyurun, açıqlamanızı yazın!
Buyurun, adınızı bura yazın