Kollektiv Təhlükəsizlik Müqaviləsi Təşkilatı (KTMT) qüvvələrinin və sülhməramlıların olduğu son 4 hərbi nəqliyyat təyyarəsi Qazaxıstandan Rusiyaya uçub.
YALAN.info Onlayn Xəbərlər və İnformasiya Saytı bildirir ki, bununla bağlı Rusiya Federasiyasının Müdafiə Nazirliyi məlumat yayıb.
“Rusiya hərbi-nəqliyyat aviasiyasının göyərtəsində sülhməramlıların olduğu 4 təyyarə Qazaxıstan Respublikasının Nur-Sultan və Almatı hava limanlarından havaya qalxıb”, – deyə nazirliyin məlumatında bildirilir.
Məlumatda deyildiyi kimi, bu təyyarələrlə sülhməramlıların son bölmələri və general-polkovnik Andrey Serdyukovun rəhbərlik etdiyi sülhməramlı kontingentin komandanlığı Rusiyaya qayıdıb.
Bundan öncə Ermənistan Respublikası, Belarus Respublikası və Tacikistan Respublikasının sülhməramlı kontingenti Rusiya Aerokosmik Qüvvələrinin hərbi-nəqliyyat aviasiyasının təyyarələri ilə vətənə qayıdıb. Qırğızıstandan olan sülhməramlılar standart texnika və silahlarla kolonnanın tərkibində yürüş edərək vətənə qayıdıblar.
