FIFA milli komandaların növbəti reytinq cədvəlini yayımlayıb. Reytinq cədvəlində futbol üzrə Azərbaycan milli komandası 88-ci yerə qədər irəliləyib. YALAN.info Online Xəbərlər və İnformasiya Saytının bildirdiyinə görə, Azərbaycan millisi siyahıda ötən ayla müqayisədə 45 addım irəliləyib.
Sentyabr siyahısında 133-cü yerdə qərarlaşmış Robert Prosineçkinin yönəltdiyi komanda bu dəfə 404 xalla 88-ci pillədə yer alıb. Milli komanda 2018-ci Dünya Çempionatının seçmə qrup mərhələsində San Marinonu səfərdə, Norveç yığmalasını isə evdə 1:0 hesabı ilə udub. Çexiya ilə səfər oyununda isə qolsuz heç-heçə əldə edən milli komandamız ardıcıl 3 oyunda qapısından qol buraxmayaraq 7 xal toplamağı bacarıb.
Azərbaycanın seçmə qrup mərhələsindəki rəqiblərindən Almaniya yığması 1 pillə irəliləyərək 1465 xalla 2-ci yerə yüksəlib. 6 pillə geriləyən Şimali irlandiya 739 xalla 36-cı, 11 pillə geriləyən Norveç 438 xalla 81-ci, 7 pillə geriləyən Çexiya 663 xalla 40-cı pillədədir. Aktivində 17 xal olan San Marino yığması isə 201-ci pillədə qərarlaşıb.
Dünya Çempionatı 2018-ə ev sahibliyi edəcək Rusiya yığması 594 xalla 15 pillə geriləyərək 53-cü pillədə dayanıb. 4 pillə geriləyərək 25-ci olan Türkiyənın aktivində isə 843 xal var. Siyahıya yenə Argentina yığması başçılıq edir. Bu komandanın hesabında 1621 xal var. İlk “3-lüy”ü 1410 xalla 1 pillə irəliləyən Braziliya qapayır.
FIFA növbəti reytinq cədvəli noyabrın 24-də yayımlayacaq.
Qeyd edək ki, DÇ-2018 seçmə mərhələsinin C qrupunda yalnız Almaniyadan geri qalmaqla ikinci pillədə qərarlaşan millimizin sıradakı rəqibi Şimali İrlandiya yığmasıdır.
DÇ-2018 – Seçmə Mərhələsi – C Qrupu
1. | Almaniya | 3-0-0 | 8:0 | 9 |
2. | Azərbaycan | 2-1-0 | 2:0 | 7 |
3. | Şimali İrlandiya | 1-1-0 | 4:0 | 4 |
4. | Norveç | 1-0-2 | 4:5 | 3 |
5. | Çexiya | 0-2-1 | 0:3 | 2 |
6. | San-Marino | 0-0-3 | 1:9 | 0 |