Futbol üzrə Azərbaycan Premyer Liqasının III turu Neftçi-Qarabağ, Səbail-Sumqayıt, Zirə-Keşlə, Qəbələ-Sabah qarşılaşmaları ilə sona çatdı.
YALAN.info Onlayn Xəbərlər və İnformasiya Saytı bildirir ki, “Bakcell Arena”dakı qarşılaşma Ağdam təmsilçisinin 2:1 hesablı qələbəsi ilə bitib. Görüş paytaxt təmsilçisi ilə SSRİ çempionatında bürünc medal qazanmış Yaşar Babayevin vəfatı ilə bağlı bir dəqiqəlik sükutla başlayıb.
“Qarabağ”ın yeni transferi İbrahima Vadji 21-ci dəqiqədə İsmayıl Zülfüqarlının səhvindən sonra hesabı açıb. Seneqallı hücumçu 45-ci dəqiqədə özünün və komandasının ikinci qoluna imza atıb.
İkinci yarıya meydan sahibəri daha fəal başlayıb. “Neftçi”nin kapitanı Emin Mahmudov 47-ci dəqiqədə hesab arasındakı fərqi azalda bilib. “Ağ-qaralar” bir neçə dəfə təhlükəli qol epizodu yaratsa da, istəyinə çata bilməyib.
Günün başqa bir qarşılaşmasında “Səbail” evdə “Sumqayıt”ı məğlub edib.
Turun başqa görüşlərində “Zirə” səfərdə “Keşlə”ni, “Qəbələ” isə “Sabah”ı 2:0 hesabı ilə üstələyib.
Turun bu nəticələrindən sonra xallarının sayını 7-ə çatdıran “Qarabağ” “Qəbələ” ilə birlikdə ilk iki pilləni bölüşdürür. “Neftçi” isə 4 xalla 5-cidir.
Azərbaycan Premyer Liqası, Turnir Cədvəli (III tur)
| N | Klublar | O | Q | H | M | T-F | X |
| 1 | Qarabağ | 3 | 2 | 1 | 0 | 6-2 | 7 |
| 2 | Qəbələ | 3 | 2 | 1 | 0 | 6-3 | 7 |
| 3 | Səbail | 3 | 2 | 0 | 1 | 2-3 | 6 |
| 4 | Sumqayıt | 3 | 2 | 0 | 1 | 4-1 | 6 |
| 5 | Neftçi | 3 | 1 | 1 | 1 | 5-5 | 4 |
| 6 | Zirə | 3 | 1 | 1 | 1 | 4-3 | 4 |
| 7 | Keşlə | 3 | 0 | 0 | 3 | 1-6 | 0 |
| 8 | Sabah | 3 | 0 | 0 | 3 | 0-5 | 0 |
Bombardirlər:
- Davit Volkov (“Zirə”) – 3 qol
- Rəhim Sadıxov (“Sumqayıt”) – 2 qol
- Fəhmin Muradbəyli (“Neftçi”) – 2 qol
- Musa Qurbanlı (“Qarabağ”) – 2 qol
- Yaovi Akakpo (“Qəbələ”) – 2 qol
- Ülvi İsgəndərov (“Qəbələ”) – 2 qol
- Vadji İbrahima (“Qarabağ”) – 2 qol
- Emin Mahmudov (“Neftçi”) – 2 qol
