Ağdamın “Qarabağ” Futbol Klubu UEFA Çempionlar Liqasının III təsnifat mərhələsinin ilk oyununda Macarıstanın “Ferentsvaroş” klubunu qəbul edib.

YALAN.info bildirir ki, Ağdamlılar Tofiq Bəhramov adına Respublika stadionunda isveçli FIFA referisi Andreas Ekberqin idarə etdiyi görüşü 1:1 hesablı heç-heçə ilə başa çatdırıblar.

Oyuna fəal başlayan “köhlən atlar” ilk təhlükəni 11-ci dəqiqədə Filip Ozobiçlə yaradıb. Ancaq xorvatiyalı yarımmüdafiəçi hədəfdən yayınıb. 3 dəqiqə sonra İbrahim Vadjinin zərbəsini qapıçı Deneş Dibus dəf edib. 17-ci dəqiqədə qonaqlar hesabı açıblar. Frank Boli fərqlənib. 28-ci dəqiqədə Şahruddin Məhəmmədəliyev rəqibin 2-ci qolu vurmasına mane olub.

34-cü dəqiqədə “Qarabağ” hesabı bərabərləşdirib. Filip Ozobiçin cərimə zərbəsini qapıçı qaytarsa da, topa hamıdan birinci çatan Kvabena Ovusu tarazlığı bərpa edib. 38-ci dəqiqədə Adama Traore Məhəmmədəliyevlə üzbəüz qalsa da, Azərbaycan millisinin qolkiperi komandasını real qoldan xilas edib.

44-cü dəqiqədə Vadji sürətli əks hücumu məntiqi sonluqla başa çatdıra bilməyib. İlk yarının əsas vaxtına artırılmış 3-cü dəqiqədə Vadji qonaqları 2-ci dəfə meydanın mərkəzinə dəvət etsə də, VAR sisteminin müdaxiləsindən sonra qol qeydə alınmayıb. Buna məhsuldar ötürməni verən Marko Veşoviçin topu qəbul edərkən ofsaydda olması səbəb olub. Birinci hissə 1:1 hesablı heç-heçə ilə sona çatıb.

İkinci yarıda “Ferentsvaroş”u tamamilə müdafiə olunmağa məcbur edən “köhlən atlar” 50-ci dəqiqədə Vadji ilə növbəti dəfə rəqib qapısı qarşısında təhlükə yaradıb. Ancaq son anda müdafiəçilər seneqallı hücumçunun fərqlənməsinin qarşısını alıblar. 59-cu dəqiqədə Marko Veşoviçin sağ cinahdan zərbəsini qapıçı çətinliklə küncə çıxarıb. 66-cı dəqiqədə sürəti hesabına 2 müdafiəçini geridə qoyan Vadji topa istədiyi kimi zərbə endirə bilməyib. 2 dəqiqə sonra isə qonaqlar 2-ci qolu vurmağa yaxın olublar. Şahruddin Məhəmmədəliyevin çıxışda səhvə yol verməsindən sonra komanda yoldaşları topu boş qapıdan çıxararaq, onu sığortalayıblar.

81-ci dəqiqədə Ovusunun cərimə zərbəsindən vurduğu top az fərqlə dirəyin yanından qapı xəttini tərk edib. 82-ci dəqiqədə “Qarabağ”ın yeni transferi Julio Romao meydana girib. Ağdam klubunda ilk oyununa çıxan braziliyalı yarımmüdafiəçi Marko Yankoviçi əvəzləyib. 86-cı dəqiqədə Ramil Şeydayev sol cinahda iki müdafiəçini geridə qoyub qapı qarşısına ötürmə etsə də, Bəhlul Mustafazadə topa toxuna bilməyib.

89-cu dəqiqədə “Ferentsvaroş”dan Tokmak Nquenin zərbəsi qapının üstündən keçib. Əsas vaxta artırılmış 3-cü dəqiqədə cərimə meydançasındakı qarışıqlıq zamanı Məhəmmədəliyev topu tutaraq, təhlükənin qarşısını alıb. Ardınca “Qarabağ”ın hücumu zamanı Vadjinin zərbəsini Dibus dəf edib. Son dəqiqələrdə komandaların səylərinə baxmayaarq, qarşılaşmada qalib müəyyənləşməyib.

Komandalar arasında cavab qarşılaşması avqustun 9-da Budapeştdə keçiriləcək.

Onu da bildirək ki, bu cütün qalibi pley-off mərhələsində “Şerif” (Moldova) – “Viktoriya” (Plzen, Çexiya) cütünün güclüsü ilə üz-üzə gələcək. Bu komandalar arasında Moldovanın paytaxtl Kişineuda baş tutan ilk oyunda qonaqlar 2:1 hesablı qələbə qazanıblar. “Qarabağ” – “Ferentsvaroş” cütündə uduzan komanda isə UEFA Avropa Liqasının pley-offunda “Şemrok Rovers” (İrlandiya) – “Şkupi” (Şimali Makedoniya) cütünün məğlubu ilə görüşəcək.

Qarabağ 1:1 Ferensvaroş | 03.08.2022 | İcmal

BİR CAVAB YAZ

Buyurun, açıqlamanızı yazın!
Buyurun, adınızı bura yazın