Futbol üzrə Azərbaycan Milli Komandası 2022-ci Dünya Çempionatının (DÇ-2022) seçmə mərhələsində son oyununu keçirib.
YALAN.info Onlayn Xəbərlər və İnformasiya Saytı bildirir ki, Canni De Byazinin başçılıq etdiyi kollektiv A qrupundakı sonuncu sınağında Lüksemburq yığmasını qəbul edib. Bakı Olimpiya Stadionunda (BOS) oynanılan və iki kollektiv arasında sayca altıncı olan qarşılaşma qonaqların 3:1 hesablı qələbəsi ilə başa çatıb.
Bu qələbədən sonra xallarını doqquza çatdıran Lüksemburq seçməsi qrup üçüncülüyünü təmin edib. Azərbaycan isə seçmə mərhələni bir xalla sonuncu sırada başa vurub.
Lüksemburq yığması 2 rekorda imza atıb
Səfər oyununda Azərbaycanı udan “cırtdanlar” dünya çempionatlarının seçmə mərhələlərində xal rekordunu yeniləyib. Belə ki, Lüksemburq DÇ-2014 və DÇ-2018-in seçmə oyunlarını 6 xalla başa vurmuşdu. Hər iki tsikldə indikinə nisbətən daha az qol vurulub.
Komanda 2014-cü il mundialından öncə seçmə oyunlarda 7, sonrakında isə 8 dəfə fərqlənmişdi. Lüksemburq millisi DÇ-2022-nin seçmə mərhələsində rəqib qapılarından 8-ci topu keçirməklə DÇ-2018 rekordunu təkrarlayıb.
Qeyd edək ki, Lüksemburq yığması xal və qol rekordunu daha da yeniləyə bilər. Bunun üçün noyabrın 14-də İrlandiya ilə ev matçında qol vuraraq, uduzmamaq lazımdır.
Azərbaycan Milli Komandasından anti-rekord
1998-ci ildən Dünya Çempionatının seçmə mərhələlərində iştirak edən Azərbaycan Milli Komandası ilk dəfə cəmi 1 xal toplaya bilib. Bundan öncəki seçmə mərhələlərdən ən zəif çıxış etdiyi 1998-ci ildə 1 qələbə ilə 3 xal və 2006-cı Dünya Çempionatının seçmə mərhələsində isə 3 heç-heçə edərək 3 xal toplaya bilmişdi.
Canni De Byazi: Belə bir oyundan sonra müqavilə haqqında danışmağın mənası yoxdur
Azərbaycan millisinin baş məşqçisi Canni De Byazi Lüksemburq yığmasına 1:3 hesabı ilə uduzduqdan sonra mətbuat konfransında oyuna azarkeş, ya da jurnalist kimi baxmaqla baş məşqçi kimi baxmağın tamam fərqli olduğunu söyləyib: “Düzdür, nəticə çox önəmlidir. Sabah oyuna təkrar baxıb analiz etsəniz, inkişafı görə bilərsiniz. Son oyunlarda öz meydanımızda 3 top buraxırıq. Bu, heç kim üçün xoş deyil. Ancaq reallıq başqa cürdür. İnkişaf gözə çarpır”.
De Byazi deyib ki, belə bir oyundan sonra müqavilə haqqında danışmağın mənası yoxdur: “Noyabrın 30-dək sözləşməm var. Federasiya agentimlə danışacaq. Mən də peşəkar kimi müqaviləmin sonunadək işimin başında olacağam”.
