Qadınlar arasında beynəlxalq dərəcəli idman ustası (WIM) Gövhər Beydullayeva şahmat üzrə Azərbaycan Çempionatının qalibi oldu.
YALAN.info bildirir ki, Azərbaycan Şahmat Federasiyasının (AŞF) Mətbuat xidmətindən məlumata görə, yarışın lideri Gövhər Beydullayeva hesabat turunda Xəyallə Abdullanı məğlub etməklə 5 xal toplayıb və karyerasında ilk dəfə Azərbaycan Çempionu adını qazanıb.
Turnirin sürpriz iştirakçısı Ləman Hacıyeva bu dəfə ağ fiqurlarla Türkan Məmmədyarovanı üstələyib. Nəticədə Hacıyeva 4,5 xalla ilk dəfə ölkə çempionatında gümüş medala sahib çıxıb.
Ülviyyə Fətəliyeva qara fiqurlarla Xanım Balacayevanı məğlub edib son sıralamada 4 xalla 3-cü pilləni tutub. Son turda Ayan Allahverdiyevanı üstələyən ötən ilin çempionu Gülnar Məmmədova isə bu dəfə 4-cü yerlə kifayətlənib.
Onu da bildirək ki, dairəvi sistem üzrə yeddi turdan ibarət çempionatın mükafat fondu 11 400 manat olub. Qalib 4 000 manat pul mükafatı əldə edib.
