Rusiyalı qrossmeyster Yan Nepomnyaşiy və norveçli Maqnus Karlsen arasında dünya şahmat tacı uğrunda mübarizənin səkkizinci partiyası ikincinin qələbəsilə nəticələnib.
YALAN.info Onlayn Xəbərlər və İnformasiya Saytı bildirir ki, hazırda ümumi hesab 5:3 indiki dünya çempionu Maqnus Karlsenin xeyrinədir.
Beləliklə, şahmatçılar arasında ilk beş və yeddinci partiyalarda heç-heçə qeydə alınıb. Altıncı və səkkizinci partiyalarda isə Karlsen üstün olub. Növbəti partiya dekabrın 7-də baş tutacaq.
Dekabrın 14-dək tərəflər toplam 14 dəfə üz-üzə gələcəklər. Bu oyunların sonunda heç-heçə qeydə alınacağı halda, sürətli şahmat üzrə 4 partiya keçiriləcək. Yenə qalib müəyyənləşməsə, öncə 2, ehtiyac yaranarsa, daha 5 blits partiya oynanılacaq. “Sülh” davam etsə, “Armageddon”a müraciət olunacaq.
Qalib Dünya Çempionu titulu ilə yanaşı 1,2 milyon avro, uduzan tərəf isə 800 min avro qazanacaq. Maqnus Karlsen 2013-cü ildə hindistanlı Vişvanatan Ananda qalib gələrək, karyerasında ilk dəfə dünya çempionluğuna yiyələnib. Karlsen daha sonra 3 dəfə titulunu qoruyub.
