Rusiyalı MMA döyüşçüsü Həbib Nurməhəmmədov növbəti dəfə məğlubedilməz döyüşçü obrazını qoruyub saxlayıb.
O, BƏƏ-nin paytaxtı Əbu Dabidə keçirilən UFC-254 turnirində yüngül çəkidə müvəqqəti çempion Castin Qeyciyə (Justin Gaethje) qalib gələrək çempionluq kəmərini yenidən ələ keçirib.
Nurməhəmmədov ikinci raundda amerikalı rəqibini boğucu fəndlə təslim olmağa məcbur edib.
O, daha sonra çıxış edərək anasına söz verdiyini, bu döyüşün onun üçün sonuncu olduğunu açıqlayıb. 32 yaşlı dağıstanlı idmançı UFC tarixində məğlubedilməz qalmaq istədiyini bildirib.
Qeyd edək ki, Həbib Nurməhəmmədov peşəkar MMA karyerasına 2008-ci ildə azərbaycanlı Vüsal Bayramovu məğlub etməklə başlayıb. O, keçirdiyi 29 döyüşdə uduzmayan yeganə MMA idmançısıdır.
UFC rəhbəri Həbib Nurməhəmmədovu “planetin ən qəddar əclafı” adlandırdı
UFC rəhbəri Deyna Uayt (Dana White) rusiyalı MMA döyüşçüsü Həbib Nurməhəmmədovu “planetin ən qəddar əclafı” adlandırıb.
Lenta.ru-nun məlumatına görə, bunu o, UFC 254 turnirindən sonra keçirilən mətbuat konfransında deyib.
“Təəccüblüdür, ancaq bu adam hələ bir raund belə uduzmayıb”, – deyə Uayt əlavə edib.
Onun sözlərinə görə, döyüşçünün təzyiqi inanılmazdır, eyni zamanda, onun zərbə gücünü yüksək dəyərləndirmək gərəkdir.
