ABŞ Prezidenti Cozef Bayden dekabrın 27-də 2022-ci il üçün müdafiə büdcəsini imzalayıb.
YALAN.info Onlayn Xəbərlər və İnformasiya Saytı bildirir ki, sənədə görə, Ukrayna Silahlı Qüvvələrinə dəstək məqsədilə 300 milyon ABŞ dollarının ayrılması nəzərdə tutulur.
Bundan əvvəl verdiyimiz xəbərə görə, ABŞ Ukraynanın Rusiya və Belarus ilə sərhədlərinin gücləndirilməsinə 20 milyon dollar ayırıb. Belə ki, Ukrayna Dövlət Sərhəd Xidməti və ABŞ-ın Kiyevdəki səfirliyi ölkə sərhədinin şimal və şərq hissələrinin təhlükəsizliyinin gücləndirilməsi ilə bağlı birgə plan imzalayıb.
Layihə Ukraynanın milli təhlükəsizliyinə yaranan təhdidlərə qarşı çıxmaq üçün sərhədçilərə texniki yardım, o cümlədən Dövlət Sərhəd Xidmətini pilotsuz uçuş sistemləri, özəl texnika, videomonitorinq avadanlıqları, rabitə vasitələri, avadanlıqlarla təmin etməyi nəzərdə tutur. Ukraynanın Dövlət Sərhəd Xidməti layihənin il ərzində həyata keçiriləcəyini açıqlayıb.
