Rusiya qoşunları Ukraynanın Mariupol şəhərindəki “Azovstal” zavoduna hücum edib.
YALAN.info bildirir ki, “Azov” alayının komandirinin müavini Svyatoslav Palamar (Kalina) bildirib ki, Rusiya qoşunları indi zavodun ərazisinə soxulmağa çalışır: “Bütün gecə bizi havadan bombaladılar. İki mülki qadın öldürüldü, indi də “Azovstal”a hücum edilir”.
Jurnalist Andrey Tsapliyenko da “Telegram” kanalında hücumun başladığını təsdiqləyib: “İndi zavodun ərazisinə soxulmağa çalışırlar. Məlumatı “Azov” alayının komandir müavini də təsdiqləyir. Hələlik əlavə təfərrüat yoxdur”.
Qeyd edək ki, mayın 1-də Mariupoldakı “Azovstal” müəssisəsinin sığınacağında olan mülki əhalinin təxliyəsinə başlanılıb. Mariupol meri Vadim Boyçenkonun sözlərinə görə, “Azovstal” ərazisində yerləşən sığınacaqlardan 100-dən çox insan çıxarılıb.
Yada salaq ki, Ukraynanın Donetsk vilayətinin Mariupol şəhəri bu il martın 1-dən tam blokadadadır. Rusiyanın Mariupolda törətdiyi qırğınlar nəticəsində təxmini hesablamalara görə, on minlərlə dinc sakin həlak olub.
Rusiyanın müdafiə naziri Sergey Şoyqu aprelin 21-də Rusiya Prezidenti Vladimir Putinə birbaşa məruzəsində Mariupol şəhərinin nəzarətə götürüldüyünü elan edib. Nazir həmçinin bildirib ki, mühasirə zamanı Mariupolda Ukrayna Silahlı Qüvvələrinin 2 000-ə yaxın hərbçisi olub. V.Putin Mariupoldakı “Azovstal” sənaye zonasına hücumu məqsədəuyğun saymadığını demişdi.