“Otuz il boyunca ATƏT-in Minsk qrupunun fəaliyyəti heç bir nəticə verməyib. Azərbaycan Silahlı Qüvvələrinin bu yaxınlarda əldə etdiyi qələbə və Ermənistanın işğalının sona çatmasından sonra onun fəaliyyətinin heç bir mənası yoxudr. İndi Minsk qrupu ölü strukturdur”.
YALAN.info Onlayn Xəbərlər və İnformasiya Saytı bildirir ki, bu fikirlər ABŞ-ın “Foreign Policy” (Xarici siyasət) dərgisində yayımlanan və Minsk qrupunun Qarabağ münaqişəsinin həlli çərçivəsində 30 illik fəaliyyətinə həsr olunan məqalədə yer alıb.
Məqalədə deyilir ki, bu qurum uzun illər boyunca qarşısına qoyulmuş vəzifələri həll edə bilməyib və sözün hərfi mənasında fiaskoya uğrayıb. Vurğulanıb ki, Ermənistan tərəfi hələ 2007-ci ilin noyabrında ATƏT-in Madrid konfransında Ermənistan və Azərbaycan xarici işlər nazirlərinə təqdim olunan “Madrid prinsiplərin”dən imtina edib: “2020-ci ildə Ermənistan Baş naziri Nikol Paşinyan qondarma “Dağlıq Qarabağ Respublikası”nın işğal olunmuş torpaqlardan qovulmuş Azərbaycan vətəndaşlarının iştirakı olmadan Azərbaycanla aparılan danışıqlarda tərəf kimi çıxış etməli olduğunu söyləməklə “Madrid prinsiplərin”dən birbaşa imtina etmiş oldu. Bu bəyanat açıq şəkildə yalnız Madrid təkliflərindən yox, həm də Minsk qrupunun fəaliyyətindən imtina edilməsi demək idi”.
Məqalədə Fransa və onun bu qurumun həmsədri kimi fəaliyyəti tənqid olunur: “Prezident Emmanuel Makron Fransanı Minsk qrupunun həmsədri kimi geri qayıdışı olmadan diskreditisaya etdi, nüfuzdan saldı. Çünki açıq bəyanatlarla Ermənistanın tərəfini tutdu və bununla da diplomatik bitərəfliyi pozdu. Makron hətta “Mən Ermənistana və ermənilərə səslənirəm: Fransa öz rolunu oynayacaq” deməkdən də çəkinmədi”.
Dərgi yazır ki, Minsk qrupunun sonrakı danışıqlarda hansısa rol oynaması üçün nəinki yeni həmsədrlər, hətta danışıqlar aparılmasının yeni çevrəsi tələb olunacaq. “Ancaq olaylar çox sürətlə inkişaf edir və etməyə də davam edəcək. ATƏT-in isə çoxtərəfli diplomatiyası ilə onlara çatdırması çətin olacaq. Bölgənin özündə iqtisadi və siyasi əməkdaşlıq təklifləri, o cümlədən Türkiyənin “altılıq platforması” (Azərbaycan, Ermənistan, Gürcüstan, İran, Rusiya və Türkiyə) olay yerindən minlərlə kilometr uzaqlıqdakı ölkələrin təqdim etdiyi siyasi sxemlərdən daha həyati və dinamikdir”, – məqalədə deyilir.
Dərgi eyni zamanda, ABŞ səfiri Riçard E.Hoqlandın sözlərindən sitat gətirib: “Biz beşulduzlu hotellərdə qalırdıq, bizə nümayəndəlik mərtəbələrində nömrələr verirdilər, bununla da əlavə xərcə düşmədən özəl yeməkxanalara və tam təmin olunmuş barlara çıxış əldə edirdik. Həmişə şəhərlərdə ən yaxşı restoranları axtarırdıq. ATƏT bayrağını göstərdiyimiz və Bakı ilə İrəvana Minsk qrupunun varlığını yada saldığımız müddətcə yaxşı yaşayırdıq. Ancaq, düzü, çox az şey əldə edilib”.
Dərgi qeyd edir ki, münaqişəni birdəfəlik həll etməyin yeganə yolu Ermənistanla Azərbaycan arasında barış anlaşmasıdır, diplomatik təcrübədə müharibələr belə sona çatır. Vurğulanır ki, Azərbaycan əhalisi Ermənistan əhalisindən üç dəfə çoxdur, ümumi daxili məhsul baxımdan isə Azərbaycan qarşı tərəfi dörd dəfədən çox üstələyir”, – Poreign Policy-nin məqaləsində bildirilib.
