Rusiya Prezidenti Vladimir Putin və Ermənistanın Baş naziri Nikol Paşinyan Moskvadakı ikitərəfli görüşdə danışıqlar zamanı Ermənistan-Azərbaycan dövlət sərhədinin delimitasiyası üzrə komissiyanın yaradılması prosesini sürətləndirmək barədə razılığa gəliblər.
YALAN.info bildirir ki, bununla bağlı Kremlin mətbuat xidməti məlumat yayıb.
“Liderlər Cənubi Qafqazdakı durumla bağlı fikir mübadiləsi aparıblar. Onlar Azərbaycan, Ermənistan və Rusiya liderlərinin müntəzəm görüşləri çərçivəsində konstruktiv işin davam etdirilməsinin və üç liderin noyabrın 10-da imzaladığı anlaşmaların ardıcıl şəkildə həyata keçirilməsinin tərəfdarı olduqlarını bildiriblər”, – bəyanatda deyilir.
Tərəflər Azərbaycan, Ermənistan və Rusiya Baş nazirlərinin müavinlərinin birgə sədrliyi ilə Cənubi Qafqazda bütün iqtisadi əlaqələrin və nəqliyyat kommunikasiyalarının qarşısının alınması üzrə Üçtərəfli İşçi Qrupun fəaliyyətini aktivləşdirməyi qərara alıblar.
Tərəflər, həmçinin regionun bütün ölkələri arasında dialoqun və çoxşaxəli əməkdaşlığın təşviqi üçün əlavə imkanlar təmin etmək üçün nəzərdə tutulmuş 3+3 əməkdaşlıq formatının uğurla fəaliyyətə başladığını qeyd ediblər.
Həmçinin, bildirilib ki, Prezident və Baş nazir Ermənistan-Türkiyə münasibətlərinin normallaşması prosesinin başlanmasını alqışlayırlar. Verilən xəbərə görə, tərəflər təhlükəsizlik məsələləri, o cümlədən Qarabağla bağlı məsələləri də diqqət mərkəzində saxlayıblar.
Kremlin məlumatına görə, Rusiya Federasiyasının prezidenti Ermənistanın baş nazirinin 2022-ci ilin ikinci yarısında KTMT-nin sammiti çərçivəsində İrəvana səfər etmək dəvətini qəbul edib.
