“Rusiya Federasiyası sanksiyaların ləğvi şərti ilə gübrə və ərzaq ixracına hazırdır”.
YALAN.info bildirir ki, Kremlin Mətbuat Xidmətinin məlumatına görə, bunu Rusiya Prezidenti Vladimir Putin Türkiyə lideri Rəcəb Tayyib Ərdoğanla telefon danışığında deyib.
“Qərb dövlətlərinin uzaqgörən maliyyə-iqtisadi siyasəti nəticəsində dünya ərzaq bazarında yaranmış problemlər fonunda Rusiyaya qarşı sanksiyaların ləğvi ilə Rusiyanın önəmli həcmdə gübrə və kənd təsərrüfatı məhsulları ixrac edə biləcəyi təsdiqlənib”, – deyə məlumatda vurğulanır.
Həmçinin Putin Ərdoğanla söhbətində Rusiyanın Türkiyə ilə razılaşdırılmış şəkildə malların maneəsiz dəniz tranzitini asanlaşdırmağa hazır olduğunu qeyd edib.
“Ukraynadakı durum müzakirə edilərkən Qara və Azov dənizlərində təhlükəsiz naviqasiyanın təmin edilməsi, onların sularında mina təhlükəsinin aradan qaldırılması məsələləri vurğulanıb. Vladimir Putin Rusiya tərəfinin türk tərəfdaşları ilə razılaşdırılaraq malların maneəsiz dəniz tranzitini asanlaşdırmağa hazır olduğunu qeyd edib. Bu, Ukrayna limanlarından taxıl ixracına da aiddir”.
Rusiya və Türkiyə Prezidentləri Rusiya Baş nazirinin müavini Aleksandr Novakın Türkiyəyə son səfərini də müzakirə ediblər və başqa təmaslar barədə razılığa gəliblər.
