Sentyabrın 27-də saat 06:00 radələrindən başlayaraq, Ermənistanın hərbi-siyasi rəhbərliyinin göstərişi ilə düşmənin silahlı qüvvələri tərəfindən Azərbaycan əhalisinin sıx yaşadığı məntəqələr ağır artilleriya atəşinə tutulur və bununla da mülki əhalimizə qarşı müxtəlif cinayətlərin törədilməsi davam edir. Oktyabrın 5-i saat 12-yə olan son məlumata əsasən, mülki əhali arasında 24 mülki şəxs həlak olub. Onlardan 5-i qadın, 3-ü uşaqdır.
AZƏRTAC xəbər verir ki, bunu Baş Prokurorluğun Mətbuat Xidmətinin rəisi Günay Səlimzadə oktyabrın 5-də keçirilən brifinqdə deyib.
Günay Səlimzadə bildirib ki, 121 mülki şəxs müxtəlif dərəcəli bədən xəsarətləri alıb. Onlardan 30-u qadın, 7-si isə uşaqdır.
