Ümumdünya Səhiyyə Təşkilatı (ÜST) gün boyunca koronavirusa (COVID-19) 3 395 785 yeni yoluxma hallarının qeydə alındığını bildirib. Bu, pandemiya başlayandan ÜST statistikasında ən yüksək gündəlik göstəricidir.
YALAN.info Onlayn Xəbərlər və İnformasiya Saytı bildirir ki, ÜST-nin məlumatına görə, dünyada ilk dəfədir 24 saat boyunca yoluxanların sayı 3 milyonu keçib.
Bundan öncəki antirekord bu il yanvarın 6-da qeydə alınmışdı. Həmin vaxt 24 saat boyunca 2 618 130 yoluxma halı aşkar edilmişdi. ÜST-nin statistikası yalnız yoluxanlar və ölənlərla bağlı dövlətlərin təqdim etdiyi rəsmi təsdiqlənmiş məlumatlar əsasında toplanır.
Son bir gün boyunca dünyada 7 735 nəfər pandemiyanın qurbanı olub. Toplam 5 501 000 nəfər koronavirusun yaratdığı fəsadlardan dünyasını dəyişib.
ÜST-yə daxil olan məlumatlara görə, ən çox təsdiqlənmiş yoluxma halı – 61 332 277 ABŞ-da qeydə alınıb. Ondan sonra Hindistan (36 070 510), Braziliya (22 558 695) və Böyük Britaniya (14 732 598) yer alırlar.
Ən çox ölüm halları – 833 519 ABŞ-da qeydə alınıb, ikinci yerdə Braziliya (620 091), üçüncü yerdə isə Hindistan (484 655) qərarlaşıb. Daha sonra Rusiya (318 432) və Meksika (300 573) yer alırlar.
