Amerikalıların ancaq 36 faizi ABŞ prezidenti Co Baydenin (Joe Biden) fəaliyyətini bəyənir. Bu, yeni tarixi minimum sayılır.
YALAN.info Onlayn Xəbərlər və İnformasiya Saytı bildirir ki, bu Kvinnipeksk Universitetinin son sorğusundan bilinib.
Bundan öncəki reytinq oktyabr ayında – respondentlərin 38 %-i prezidentə dəstək verdiyini bildirəndə qeydə alınmışdı. İndi isə respondentlərin 53 %-i Baydenin fəaliyyətini bəyənmir (bir ay öncəkindən 1% çox).
Amerikalılar prezidentin işinin əsasən iqtisadiyyat, koronavirus (COVID-19) pandemiyasına qarşı mübarizə, xarici siyasət və iqlim dəyişikliyi ilə mübarizədə çox zəif olduğunu düşünürlər.
Respondentlərin yarısı (51 %) prezidenti dürüst hesab etmədiklərini, 42 faizi isə əks düşüncədə olduqlarını bildiriblər. 57 % onun yaxşı liderlik keyfiyyətlərinin olmadığına inanır, 37 % onlarla razılaşmır. 56 % ABŞ-ın indiki administrasiyasının yetərincə səriştəli olmadığına əmindir, 40 % isə bunun əksini düşünür.
Baydenin reytinqini cənub sərhədindəki miqrasiya böhranı, Əfqanıstandakı fiasko və iqtisadi vəziyyət sarsıdıb. Son sorğu göstərdi ki, ABŞ prezidentini daha çox siyasətdən mümkün qədər uzaq olan və özlərini demokratların, ya da respublikaçıların tərəfdarı hesab etməyənlər tənqid edib.
