Kiyevə aparan yollar güvənli şəkildə “qıfıllanıb”, Rusiya qoşunları paytaxta girə bilməyəcək.
YALAN.info Onlayn Xəbərlər və İnformasiya Saytı bildirir ki, bununla bağlı Ukrayna Silahlı Qüvvələrinin Quru Qoşunlarının İctimaiyyətlə Əlaqələr Xidmətinin Facebook-dakı məlumatında deyilir.
O cümlədən qeyd edilib ki, Kiyevin müdafiə komandanı – Ukrayna Silahlı Qüvvələrinin Quru Qoşunlarının komandanı, general-polkovnik Aleksandr Sırski paytaxtın şimal-qərb hissəsində – Moşun yaşayış məntəqəsində müdafiəni yoxlayıb.
“12 gündən artıqdır ki, düşmənin bu istiqamətdə ukraynalı müdafiəçilərin müdafiəsini yarmaq üçün çalışmaları uğursuzluğa düçar olur. Burada Rusiyanın işğalçı qoşunları ilə şiddətli döyüşlər gecə-gündüz davam edir. İşğalçı texnika və canlı qüvvədə çox sayda itki verir”, – məlumatda deyilir.
Ukrayna hərbçiləri ilə söhbətdən sonra Sırski qeyd edib ki, ukraynalı müdafiəçilər vətənlərini qorumağa hazırdırlar. “Paytaxta aparan yollar isə güvənli şəkildə “qıfıllanıb”, Rusiya qoşunları paytaxta girə bilməyəcək”, – məlumatda vurğulanıb.
Bundan başqa, ukraynalı müdafiəçilərin əhval-ruhiyyəsi də yüksək səviyyədədir. “Biz hər fürsətdə düşməni məhv edəcəyik”, – Sırski bildirib.
