ABŞ dövlət katibi Entoni Blinken bəyan edib ki, Rusiya hərbçilərinin Ukraynadakı hərəkətlərini hərbi cinayət hesab edir.
YALAN.info bildirir ki, bu açıqlama dövlət katibi Entoni Blinken, prezident Co Bayden və dövlət katibinin müavini Vendi Şermanın hərbi cinayətlərin baş verməsinin onların şəxsi fikirləri olduğunu deməsindən sonra verilib. Bu dəfə Blinken öz mövqeyinə düzəliş edib.
“Bu gün mən elan edə bilərəm ki, indiki mövcud olan məlumatlara görə, ABŞ hökuməti Rusiya ordusunun üzvlərinin Ukraynada hərbi cinayətlər törətdiyinə inanır. Bizim dəyərləndirməmiz hökumət və kəşfiyyat mənbələrindən əldə edilən məlumatların hərtərəfli nəzərdən keçirilməsinə əsaslanır.
Hər hansı bir iddia edilən cinayətdə olduğu kimi, cinayətin yurisdiksiyasına malik olan məhkəmə konkret işlərdə cinayət təqsirini müəyyən etmək üçün son nəticədə məsuliyyət daşıyır. Biz cinayət təqibi də daxil olmaqla, bütün mövcud vasitələrdən istifadə edərək hesabatlılığa nail olmağa çalışırıq”, – o bildirib.
Daha öncə ABŞ-da Putinin diplomatiya yolu ilə Ukraynadakı müharibəni dayandırmağa və bitirməyə hazır olduğuna dair heç bir əlamət görmədikləri söylənilirdi. Blinken qeyd edib ki, diplomatiya hər iki tərəfdən danışıqlara və gərginliyin birbaşa azaldılmasına məsuliyyətli münasibət tələb edir. Bununla belə, o, Rusiyanın danışıqlara hazır olmadığını bildirib.
