Qazaxıstan Respublikasının Prezidenti Kasım-Jomart Tokayev mayın 10-da Türkiyəyə dövlət səfərinə gəlib.
YALAN.info bildirir ki, Ankarada Türkiyə Prezidenti Rəcəb Tayyib Ərdoğan ilə Qazaxıstan Prezidenti Kasım-Jomart Tokayev arasında görüş keçirilib.
Prezidentlərin təkbətək görüşündən sonra iki qardaş ölkəni təmsil edən heyətlər görüşüblər. Görüşlər başa çatdıqdan sonra dövlət başçıları birgə mətbuat konfransı keçiriblər. Türkiyə ilə Qazaxıstan arasında münasibətləri strateji ortaqlıq səviyyəsinə yüksəldən siyasi bəyanat imzalanıb.
Türkiyə və Qazaxıstanın dil, din və mədəniyyət ortaqlığını yüksək dəyərləndirən Rəcəb Tayyib Ərdoğan əminliklə bildirib ki, birgə atacağımız addımlar sayəsində iki ölkə arasında illik ticarət dövriyyəsini 10 milyard dollara yüksəldəcəyik.
Qazaxıstan və Türkiyənin Avrasiyada sülhün bərqərar olmasına xüsusi önəm verdiyinə diqqət çəkən Prezident Kasım-Jomart Tokayev bildirib ki, hər iki ölkə Trans-Xəzər Beynəlxalq nəqliyyat dəhlizinin potensialından daha səmərəli istifadə etməyə üstünlük verir.
Liderlər Türk Dövlətləri Təşkilatı çərçivəsində əməkdaşlıq əlaqələrinin genişlənməsi və perspektivlər ətrafında səmərəli müzakirələr aparıldığını bildiriblər. Dövlət başçıları bildiriblər ki, Ankarada imzalanan sənəd Türkiyə-Qazaxıstan münasibətlərini strateji ortaqlıq səviyyəsinə yüksəldib.
