“Çox vacib və maraqlı oyuna hazırlaşırıq. Fərqli oyun göstərən komandaya qarşı oynayacağıq. Bu görüşə hazırlaşmaq üçün xeyli vaxtımız oldu. Amma bilirik ki, rəqib də bu oyuna ciddi hazırlaşıb. Çempionat oyunlarında bəzi əsas futbolçulara istirahət verilməsi də bunu deməyə əsas verir”.
YALAN.info bildirir ki, bunu “Qarabağ” FK-nın baş məşqçisi Qurban Qurbanov İsveçrədə “Sürix”ə qarşı keçirəcəkləri UEFA Çempionlar Liqasının (ÇL) II təsnifat mərhələsinin cavab oyunundan öncə mətbuat konfransında deyib.
50 yaşlı mütəxəssis bildirib ki, oyunun gedişində komandası hər hansı sürprizlə qarşılaşa bilər: “Meydanda hər şeyə hazır olmalı, yaxşı nəticə qazanmaq üçün həddindən artıq güc sərf etməliyik. Demək olar ki, buna hazırıq”.
O, ötənilki kollektivlə indiki komandanı müqayisə edib: “Açığı, elə bir fərq yoxdur. Sadəcə, rəqiblər fərqlidir. Biz hər komandaya qarşı düzgün və diqqətli oynamağa çalışırıq. Sadəcə, bu dəfə ilk iki mərhələlərdə daha ciddi rəqiblərlə düşdük. Digər tərəfdən, ötən mövsüm Konfrans Liqasında mübarizə aparırdıq. İki turnir arasında səviyyə tam başqadır. Ona görə də ÇL-də daha çox məsuliyyət tələb olunur. Burada səhvlər bağışlanmır”.
Təcrübəli baş məşqçi heyətlə bağlı çox dəyişiklik etməyi xoşlamadığını vurğulayıb: “Güvəndiyim oyunçular var. İstənilən an hər bir futbolçunu düşünmədən əsas heyətdə oynada bilərəm. Həm də bəzi oyunlar fərqli olur. Bəzən rotasiyalar edirsən. Sabah da xırda dəyişikliklər mümkündür”.
Qurbanovun sözlərinə görə, bunlar elə oyunlardır ki, gedişatda artırılmış vaxta, ya da penaltilər seriyasına hazır olmaq lazımdır: “Bir qədər əvvəl rəqib futbolçunun müsahibəsini oxudum. Deyib ki, bu görüş finala bərabərdir. Həqiqətən hər şeyə hazır olmalyıq. Oyunun gedişatına uyğun qərarlar verməyə çalışmalıyıq. Çünki “Sürix” də ciddi rəqibdir. Amma çox istərdik ki, oyunun taleyi ilk yarıda həll olunsun”.
Mütəxəssis ilk görüşdə olduğu kimi, cavab oyununda da tərəflərin açıq oyuna üstünlük verə biləcəyini istisna etməyib: “Hər iki komandanın oyun üslubu bunu deməyə əsas verir. Biz buraya müdafiə olunmağa gəlməmişik. Rəqib də hücuma keçməlidir. Çox istərdik ki, azarkeşlər üçün da maraqlı qarşılaşma olsun. Rəqib çox məcbur etmədikcə müdafiədə oturmaq fikrimiz yoxdur. Qapalı oyun olacağını düşünmürəm”.
Bildirək ki, iyulun 27-də oynanılacaq “Sürix”-“Qarabağ” oyunu Bakı vaxtı ilə saat 21:00-da başlayacaq. Bakıdakı ilk görüşdə “köhlən atlar” 3:2 hesablı qələbə qazanıb.
