Avropa Birliyi-Azərbaycan biznes forumu çərçivəsində AB tərəfindən hazırlanmış “Azərbaycanda biznes mühiti – 2021” hesabatı da təqdim edilib. Avropa şirkətlərinin davam edən yerli islahatlara və qurumların fəaliyyətinin qiymətləndirilməsi sorğusuna əsasən Kiçik və Orta Biznesin İnkişafı Agentliyi (KOBİA) öz mövqeyini önəmli dərəcədə yaxşılaşdıraraq ilk beşlikdə yer alıb (6,04 bal).
YALAN.info bildirir ki, bununla bağlı Kiçik və Orta Biznesin İnkişafı Agentliyinin (KOBİA) saytında məlumat verilib.
Hesabatda xarici investorlar KOBİA tərəfindən KOB-ların dəstəklənməsi məqsədilə tətbiq olunan dəstək və xidmətləri səmərəli və faydalı hesab edib. Həmçinin hesabatda KOBİA-nın nəzdində fəaliyyət göstərən KOB evləri, KOB inkişafı mərkəzləri, KOB dostu şəbəkəsi və başqa xidmətlərin səmərəli fəaliyyəti qeyd olunur.
Forum çərçivəsində təşkil olunmuş “Maliyyə və digər resurslara çıxış” mövzusunda panel toplantısında çıxış edən KOBİA-nın İdarə Heyətinin sədri Orxan Məmmədov KOB-ların maliyyə resurslarına çıxışına dair düçüncələrini bölüşüb. Qeyd olunub ki, KOB-ların maliyyələşdirilməsini asanlaşdırmaq üçün qlobal, regional və milli səviyyədə səylər göstərilir.
Bu sahədə KOB-ların maliyyə savadlılığının artırılması, mövcud fondlara çıxışın asanlaşdırılması, öz maliyyə alətləri çərçivəsində, eyni zamanda Agentliyin 20-dən çox KOB inkişaf mərkəzi vasitəsilə maliyyə məsələləri üzrə ödənişsiz təlim və məsləhət xidmətləri göstərilir. KOBİA tərəfindən KOB-lara qrant verilir, daxili bazar araşdırmasına çəkilən xərcin bir hissəsi dövlət tərəfindən maliyyələşdirilir, KOB-ları innovasiya fəaliyyətindən əldə etdikləri gəlirlər üzrə mənfəət və gəlir vergisindən 3 il müddətində azad edən “Startap” şəhadətnaməsi verilir.
Agentliyin nəzdində fəaliyyət göstərən Dövlət-Sahibkar Tərəfdaşlığının İnkişafı Mərkəzi də KOB-ların müxtəlif layihələrə cəlb edilməsi ilə bağlı bir sıra tədbirlər həyata keçirir. Eyni zamanda indi KOB İnkişafı Fondunun yaradılması üzrə işlərin aparıldığını qeyd edən Orxan Məmmədov sözügedən Fond tərəfindən KOB-lara qrantlar və texniki yardımın təklif ediləcəyini vurğulayıb.
