Minifutbol üzrə Azərbaycan milli komandası Slovakiyanın Koşitse şəhərində keçirilən Avropa Çempionatında (EMF EURO 2022) finala yüksəlib.
YALAN.info bildirir ki, Elşad Quliyevin baş məşqçi olduğu komanda yarımfinalda 2017-ci ilin qitə çempionu olmuş Qazaxıstanı mübarizədən kənarlaşdırmağı bacarıb.
Rəqib iki dəfə hesabda önə keçsə də, Bəxtiyar Soltanov 18-ci, Tural Nərimanov isə 26-cı dəqiqədə bərabərlik qollarını vurub. Oyunda son nöqtəni isə 32-ci dəqiqədə Samir Həmzəyev qoyub. Beləliklə, Azərbaycan millisi Avropa Çempionatında finala yüksəlməklə, tarixi uğura imza atıb. Finalda rəqib Bolqarıstan üzərində qələbə qazanmış Rumıniya olacaq.
Onu da bildirək ki, Azərbaycan millisi 1/4 finalda meydan sahibi Slovakiyaya 1:0, Qazaxıstan isə əsas vaxtı 1:1 hesablı heç-heçə ilə sonlanmış qarşılaşmada Macarıstanı penaltilərlə yenmişdi – 4:3.
Avropa Çempionatı 2022: Yarımfinal, Azərbaycan-Qazaxıstan: 3-2
Koşitse (Slovakiya), “Steel Arena” – 10 iyun, 20:30
Qollar: Bəxtiyar Soltanov, 18. Tural Nərimanov, 26. Samir Həmzəyev, 32 – Şaxrur Xaşimov, 9. Medet Kudaybergenov, 20
Minifutbol üzrə Avropa Çempionatının finalında Azərbaycan millisinin rəqibi Bolqarıstanla yarımfinal qarşılaşmasından 1:0 hesablı qələbə ilə ayrılan Rumıniya yığması olacaq. Oyun Bakı vaxtı ilə saat 00:15-də başlayacaq.
