“Azərbaycan Ermənistanla münasibətlərin normallaşması ilə bağlı qarşı tərəfə 5 maddədən ibarət təklif göndərib və indi cavab gözləyir”.
YALAN.info Onlayn Xəbərlər və İnformasiya Saytı bildirir ki, bunu Azərbaycan Respublikasının xarici işlər naziri Ceyhun Bayramov “Anadolu” Agentliyinə açıqlamasında deyib.
Onun sözlərinə görə, Ermənistan münasibətlərin normallaşmasını istəyirsə, bu, onlar üçün çox yaxşı fürsətdir. Nazir əlavə edib ki, Azərbaycan tərəfi keçmişin bütün çətinliklərinə və problemlərinə baxmayaraq Ermənistanla münasibətlərin normallaşmasının tərəfdarıdır.
“Bir ilə yaxındır ki, Ermənistan tərəfindən bizim təklifimizə heç bir cavab verilmir. Azərbaycan tərəfi öz xoşməramlılığını göstərmək üçün bu yaxınlarda Ermənistana yeni təkliflə çıxış edib. Əgər Ermənistan artıq atəşkəs üzərində işləməyə hazır olmadığını düşünsə, təklif çox əhatəli sənəd ola bilər. Çünki biz Ermənistan tərəfinə mahiyyətcə ölkələr arasında münasibətlərin normallaşdırılmasını özündə ehtiva edən bəzi əsas prinsipləri təklif etmişik.
Biz dövlətlər arasında münasibətlərin tənzimlənməsi ilə bağlı əsas prinsiplərə və ənənələrə uyğun olaraq rəy bildirmişik. Ermənistan bunlara baxıb öz fikrini bildirməlidir. Əgər Ermənistan səmimi şəkildə münasibətlərin normallaşmasını istəyirsə, bu, onlar üçün çox yaxşı fürsətdir. Ermənistanın cavabı tezliklə bilinəcək və biz təbii ki, bundan sonra uyğun addımları atacağıq”.
Təklifin bu yaxınlarda göndərildiyini qeyd edən C.Bayramov vurğulayıb: “Bir səhifəlik sənəddir. Əsas prinsiplər müəyyənləşdirilib və bu prinsiplər irəli sürülüb. Deməliyəm ki, həmin sənəddə qeyd olunan prinsiplərin hamısı beynəlxalq münasibətlərin prinsipləridir, orada qeyri-adi şərhlər yoxdur”.
Nazir əlavə edib ki, iki ölkə arasında sərhədlərin müəyyənləşdirilməsi məsələsi də bu təkliflər arasındadır: “Prosesin başlanması üçün ilkin şərtlər qəbuledilməzdir. İkitərəfli əməkdaşlıq qrupu yaradılmalı və bu qrup öz işinə başlamalıdır. Bir il öncə Ermənistana təqdim edilən təklif cavabsız qaldı. Ermənistan tərəfinin bu ikinci təklifə verdiyi cavaba baxaraq, yaxın vaxtlarda nə qədər səmimi olduğunu görəcəyik”.
