Futbol üzrə Azərbaycan millisi AVRO-2024-ün seçmə mərhələsində növbəti oyununu keçirib.
YALAN.info bildirir ki, Canni De Byazinin baş məşqçisi olduğu kollektiv Bakıda İsveçi qəbul edib.
Tofiq Bəhramov adına Respublika stadionunda baş tutmuş qarşılaşma komandamızın 3:0 hesablı qələbəsi ilə sona çatıb. Qolları 3-cü və 89-cu dəqiqədə kapitan Emin Mahmudov, 6-cı dəqiqədə isə Renat Dadaşov vurub. Oyunun 57-ci dəqiqəsində Bəhlul Mustafazadə birbaşa qırmızı vərəqə alaraq meydandan qovulub.
Beləliklə, yığmamız tarixində ilk dəfə Skandinaviya təmsilçisini məğlubiyyətə uğradıb. Millimiz bu nəticə ilə İsveçlə xallarının sayını bərabərləşdirib. Hər iki kollektivin 7 xalı var.
F qrupunun digər görüşündə Avstriya səfərdə Estoniyanı məğlub edib – 2:0. Bundan sonra bütün komandalardan 1 oyun artıq keçirən Avstriya millisi qrupda liderliyə yüksəlib. Sonuncu oyununu Azərbaycana qarşı keçirəcək Belçika millisi hələlik 17 xalla ikinci yerdədir. Sadəcə Azərbaycanla heç-heçə etməyi bacaran Estoniya 1 xalla ən aşağıda yer tutur.
AVRO-2024 Seçmə Mərhələsi: F qrupu
| # | Komanda | O | Q | H | M | VQ | BQ | TF | Xal |
|---|---|---|---|---|---|---|---|---|---|
| 1 | Avstriya | 8 | 6 | 1 | 1 | 17 | 7 | 10 | 19 |
| 2 | Belçika | 7 | 5 | 2 | 0 | 17 | 4 | 13 | 17 |
| 3 | İsveç | 7 | 2 | 1 | 4 | 12 | 12 | 0 | 7 |
| 4 | Azərbaycan | 7 | 2 | 1 | 4 | 7 | 12 | -5 | 7 |
| 5 | Estoniya | 7 | 0 | 1 | 6 | 2 | 20 | -18 | 1 |
Qeyd edək ki, Azərbaycan yığması seçmə mərhələdə sonuncu oyununu səfərdə Belçikaya qarşı keçirəcək. Noyabrın 19-da Brüsseldə reallaşacaq oyun Bakı vaxtı ilə saat 21:00-da başlayacaq.
