“Zelenski və Putinlə təmaslarımı davam etdirirəm. Şərtlərin çətinliyindən xəbərdarıq, ancaq diplomatiyanı yeganə çıxış yolu kimi görən səmimi təşəbbüslərimizi davam etdirəcəyik”.
YALAN.info bildirir ki, bu fikirləri Türkiyə Prezidenti Rəcəb Tayyib Ərdoğan ölkəyə səfərdə olan Niderlandın Baş naziri Mark Rutte ilə birgə mətbuat konfransında bəyan edib.
“Biz Türkiyə olaraq Ukrayna böhranı başlayandan bəri qəti mövqe tutmuşuq. Onları sağlam düşüncəyə çağırdıq. Təəssüf ki, Ukraynada humanitar faciə genişlənməkdə davam edir. Bu tendensiyaya son qoymaq üçün sıx diplomatik səyləri davam etdiririk. Xarici işlər nazirimiz Lvovda həmkarları ilə görüşüb. O, atəşkəs və sülh yolunda əlimizdən gələni edəcəyimizi vurğulayıb”, – deyə dövlət başçısı bildirib.
Öz növbəsində Niderland baş naziri Mark Rutte də həm Ukrayna, həm də Rusiya ilə dialoq aparmağa qadir olan Türkiyəni tam şəkildə dəstəklədiklərini vurğulayıb.
Ərdğan: NATO ölkələri müdafiə sənayesi istiqamətində atılacaq addımlarda həmrəy olmalıdır
Türkiyə Prezidenti R.T.Ərdoğan ölkəyə səfərdə olan Niderland Baş naziri Mark Rutte ilə təşkil edilən ortaq mətbuat konfransında çıxış edərək deyib: “Əgər biz NATO-da birlikdəyiksə, həmrəyliyimizi tam şəkildə nümayiş etdirməliyik. NATO ölkələri olaraq özəlliklə müdafiə sənayesi istiqamətində atılacaq addımlarda həmrəy olmalıyıq”.
“Artıq dünyada heç bir ölkə müdafiə sənayesindəki məhsulları təkbaşına istehsal etmir. Necə ki, biz bunu Rusiya-Ukrayna müharibəsində də görürük. Biz bunu Liviya və Azərbaycanda da gördük. Bundan sonra kim bilir harda, nə görəcəyik?! Ümid edirik ki, biz bunların olmadığı və sülhün hökm sürdüyü bir dünya quracağıq”, – deyə dövlət başçısı bildirib.
