Rumıniyanın paytaxtı Buxarestdə keçirilən Avropa Çempionatında Azərbaycanın qadın güləşçiləri Mariya Stadnik (50 kq) 10-cu dəfə, Alyona Kolesnik (59 kq) isə ilk dəfə qızıl medal qazanıb.
YALAN.info bildirir ki, Azərbaycanın onqat Avropa Çempionu, güləşçi Mariya Stadnik (50 kq) Idman.biz-ə müsahibə verib.
– Rumıniyanın paytaxtı Buxarestdə keçirilən Avropa çempionatında növbəti qızıl medal qazandınız. Çıxışınızı necə şərh edərsiniz?
– Əlbəttə, şadam. Ötən il doqquzuncu dəfə Avropa çempionu olanda demişdim ki, öz ölkəmin adını ucaltmaq, himnini səsləndirmək üçün Azərbaycan bayrağını 10-cu dəfə yüksəyə qaldırmaq istəyirəm. Söz verdiyim kimi, bunu dünən reallaşdırdım.
Mənəvi planda mənim üçün özəl yarış idi. Axı yubiley qələbəm idi. Ölkəm, qadın güləşi və karyeram üçün tarix yazdım. 10 gözəl rəqəmdir. Faktiki olaraq rəqəmlər bir-birindən fərqlənmir. Bu, sadəcə, rəqəmlərdir və başa düşürsən ki, qələbə yubiley xarakterlidir. Yəqin ki, mənim son Avropa çempionatım idi. Prinsipcə, bunu zaman göstərəcək. Çıxışlarımı gözəl notla bitirmək istəyirdim. Hərçənd, 11 də yaxşı rəqəmdir (gülür).
– Artıq bu qələbənizlə bir daha sübut etdiniz ki, Avropada rəqibiniz yoxdur.
– Demək olmaz ki, rəqib yoxdur. Həmişə var. Onlar yetişirlər. Ancaq hələlik Avropada bu çəkidə “avtoritet” mənəm. Bunu 10 dəfə sübut etmişəm. Bu qızıl mənə motivasiya verir.
– Finalda türkiyəli Evin Demirhanla aranızda hansısa problem yaşanmışdı ki, o, sonda sizinlə görüşmədi?
– Türkiyəli idmançını fəndlə atanda məni dişlədi. Bunun təsadüf olduğunu düşündüm. Ancaq fəndi bitirdikdən sonra gördüm ki, dişlərini mənim dərimdən bir parça qoparacaq kimi sıxıb. Çünki dişlərini buraxmırdı. Ona dedim ki, belə olmaz, təsadüfən alınar, ancaq belə yox. Onun emosiyalarını başa düşürəm. Adam uduzanda… Ancaq yenə də… Qabırğamda çapıq qalıb. Onunla söhbət etdik, yaxşı qızdır, başa düşdü və üzr istədi. Emosiyalarının təsirində olduğunu bildirdi.
– Yubiley çempionluğu və kolleksiyanızda olmayan Olimpiya çempionluğu. Parisdə sizdən qızıl gözləyəkmi?
– 35 yaşım və Paris-2024 Yay Olimpiya Oyunlarında da az qalıb. Avropa çempionatında gördüm ki, yaşım üçün çox yaxşı formadayam. Parisə gedəcəyəm və hər şey yaxşı olacaq.
– Böyük azarkeş kütləniz var. Onlarla sevincinizi necə bölərdiniz?
– Yubileylərdə arxada qalan dövrə yekun vurursan. Mən də bu illər ərzində yanımda olan bütün komandama təşəkkür etmək istəyirəm. Çünki siz xalçada məni görürsünüz, onun arxasındakıları görmürsünüz. Bunlar məşqçilər, federasiya, masajçılar, həkimlər, psixoloq, sparrinq rəqiblərdir. Bu, komandanın ümumi əməyidir. Buna görə də belə insanları qarşıma çıxardığı üçün Allaha təşəkkür edirəm. Komandam və ölkəm üçün tarix yazmağımda onların rolu böyükdür. Hər kəsə, əlbəttə ki, məni dəstəkləyən Azərbaycan azarkeşlərinə də təşəkkür edirəm. Məni necə sevdiklərini bilirəm. Sağ olsunlar.
