Şimali Atlantika Alyansının (NATO) baş katibi Yens Stoltenberq (Jens Stoltenberg) 2019-cu ildən bu yana ilk dəfə keçirilən NATO-Rusiya danışıqlarından sonra mətbuata açıqlamalar verib.
YALAN.info Onlayn Xəbərlər və İnformasiya Saytı bildirir ki, o, Rusiyanın Ukrayna sərhəddində güclənməsindən sonra yaranan gərgin durum və Avropanın güvənliyi ilə bağlı danışıb.
“Biz Rusiyanı beynəlxalq öhdəliklərini yerinə yetirməyə, Ukraynanın şərqində hərbi mövcudluğunu və gərginliyi azaltmağa çağırırıq. Rusiya Ukraynaya hərbi müdaxilə edərək Ukrayna ərazisini işğal edib, Krımı güc yolu ilə ilhaq edib və bölgədəki separatçılara dəstək verib. Ona görə də Ukraynanın özünümüdafiə hüququ var. Gərginliyi azaltmalı olan tərəf Rusiyadır”, – deyə NATO rəhbəri bəyan edib.
O, vurğulayıb ki, əgər Rusiya Ukrayna məsələsində səhv etsə, bunun bədəli ağır olacaq.
“Bizim missiyamız sülhü qorumaqdır. Rusiyanın Krımı ilhaq etməsi və onun hərbi güclənməsi qarşısında biz şərq sərhədimizdə müttəfiqlərimizi qorumaq üçün hərbi varlığımızı artırdıq. Bununla belə, bizim missiyamız sırf sülhməramlı və müdafiə məqsədi daşıyır. Bugünkü görüşün diqqət mərkəzində Ukrayna idi. Ancaq Rusiyanın müxtəlif ölkələrə hərbi müdaxilələri, Avropaya hücumları var.
Rusiyanın Gürcüstan, Moldova və Ukraynada hərbi varlığı bizi rahatsız edir. Bu ölkələrin ərazi bütövlüyünə hörmət edilməlidir. Biz Rusiya ilə masa arxasında oturub konkret təklifləri müzakirə etməyə hər zaman hazırıq. NATO Rusiya ilə əlaqə saxlayacaq və danışıqları davam etdirəcək. Ancaq bu, əsas prinsiplərdən imtina etmək demək deyil”, – Stoltenberq bildirib.
