“Allah məni neçə dəfə qoruyub, saxlayıb. Həyatımda bir neçə dəfə ölümlə üz-üzə gəlmişəm. Yəqin ki, Allahın mənə yazığı gəlib ki, balalarım tək qalar. 90-cı illərin ağrısını, acısını, dəhşətini öz gözümlə görmüşəm”.

YALAN.info bildirir ki, bunu Moderator.az-a eksklüziv açıqlamasında Azərbaycanın Xalq artisti Fatma Mahmudova deyib.

Fatma xanım erməni terrorunun dəhşətlərindən danışıb: “1991-ci ildə Gəncənin girəcəyində ermənilərin bomba qoyub partlatdığı Ağdam-Tiflis avtobusunda övladımla birlikdə mən də olmuşam. Oradan 5-6 nəfər sağ çıxdı. Çox ağır yaralandım, bir ilə yaxın yaddaşımı itirdim. İndi həmin yerdə həlak olanların xatirəsinə abidə də qoyulub. Ermənilərin məqsədi Gəncə avtovağzalını partlatmaq idi”.

“Biz komediya aktyorları adətən həyatımıza əks olan obrazları oynayırıq. Elə bir çətin günüm olub ki, içim qan ağlayıb, amma özüm səhnədə çıxıb tamaşaçıları güldürmüşəm. Tamaşaçıya bizim problemimiz maraqlı deyil, o pul verib bilet alıb. 5 günlük dünyadır, bəzən görürsən ki, bir-birlərinin ətini yeyirlər. Vallah həyat qısadır, olmaz ki, mehriban olasınız? Heç kim bu gündən sabaha zəmanət vermir”, – deyə sənətkar bildirib.

Fatma Məmmədova 30 ildən sonra vətəninə qayıtmasının sevincini də bölüşüb: “Keçmişə qayıtmaq istəmirəm, amma mənim çəkdiklərimi heç kim çəkməyib. Vaxtilə mənə də çox xəyanətlər olunub. Mənə elə bir zərbə vurublar ki, ölən günümə qədər onları bağışlamaram. Övlad acısı da yaşamışam, vətən acısı da. Övladlarıma görə yaşayıram. Hər anaya belə övlad qismət olmur. Allah məni bu günlər üçün qoruyub saxladı, 30 ildən sonra gedib Ağdamı da gördüm. Allahıma şükürlər edirəm”.

BİR CAVAB YAZ

Buyurun, açıqlamanızı yazın!
Buyurun, adınızı bura yazın