Türkiyənin Muğla əyalətində 4 gün öncə başlayan güclü meşə yanğınları artıq tam nəzarət altına alınıb.
YALAN.info “Report”un Muğlaya ezam olunmuş əməkdaşına istinadən xəbər verir ki, bölgənin xüsusilə Köyceyiz, Yeşilbelde, Dalaman, Marmaris, Seydikemer rayonlarında daha şiddətli şəkildə izlənilən yerlərə intensiv müdaxilələr nəticəsində yanğın tam lokallaşdırılıb.
Belə ki, iyunun 24-də gecə saatlarından indiyədək həcminə görə ən iritutumlu Mi-26 tipli helikopterləri Muğladaki müxtəlif yanğın nöqtələrinə 200 tona yaxın su boşaldıb.
Qeyd edək ki, küləyin istiqamətinin və surətinin dəyişməsi nəticəsində genişlənmiş yanğın bölgələrinə 253 yanğınsöndürən maşın, 30-dan çox su tankeri, 46 helikopter və 15 təyyarə olmaqla, toplam 600-dən artıq müxtəlif təyinatlı texnikalar cəlb olunub.
Bununla yanaşı, İstanbul, Ankara, İzmir və Antalya başda olmaqla Türkiyənin 22 şəhər və vilayətlərindən xüsusi xilasetmə və yanğınsöndürmə əməkdaşları yanğın baş verən yaşıllıq zolaqlarında soyutma işləri aparır.
Türkiyə Prezidenti Rəcəb Tayyib Ərdoğan Muğlada başlayan builki yanğınlarda toplam 4 500 hektar əraziyə ziyan dəydiyini açıqlayıb.
Yada salaq ki, Azərbaycan Prezidentinin tapşırığına uyğun olaraq Fövqəladə Hallar Nazirliyinin tabeliyində “BE-200ÇS” tipli amfibiya təyyarəsi də qardaş ölkənin yanğınla mübarizəsinə dəstək verməkdədir. Dünən müxtəlif koordinatlar üzrə yanğınsöndürmə tapşırıqlarını yerinə yetirən Azərbaycanın amfibiya təyyarəsi 120 tondan artıq su boşaldıb. Yerli əhali Azərbaycana göstərdiyi dəstəyə görə minnətdarlıq edib.
