Azərbaycanın daha bir idmançısı Tokio-2020 Yay Olimpiya Oyunlarının finalında büdrəyib: 61 kq çəkidə yarışan karateçimiz İrina Zaretskaya da gümüş medal qazandı.
YALAN.info Onlayn Xəbərlər və İnformasiya Saytı bildirir ki, karateçimiz İrina Zaretskaya Feryal Abdelazizə (Misir) 0:2 hesabı ilə uduzub.
Bununla da İrina Zaretskaya da karateçi Rafael Ağayev və sərbəst güləşçi Hacı Əliyev kimi finalda uduzaraq, gümüş medalla kifayətlənib.
İrina Zaretskaya ağlaya-ağlaya fikirlərini çatdırıb:
“Bilirdim ki, qızıl medal götürə bilərdim. Buna çox yaxın idim. Sadəcə, buna vaxtım çatmadı. Başa düşürdüm ki, bu çox önəmlidir. Məni dəstəkləyən hamıya təşəkkür edirəm. Bilirdim ki, bütün Azərbaycan məndən qızıl medal gözləyirdi. Ancaq qismət olmadı”.
