“Tokayev özünü qorumalı və hakimiyyətini gücləndirməlidir, bunun yolu isə baş verənlərə görə məsuliyyəti Nazarbayev və onun yaxınlarına üzərinə yönəltməkdir”.
YALAN.info Onlayn Xəbərlər və İnformasiya Saytı bildirir ki, bunu politoloq Elxan Şahinoğlu deyib. Ekspert Qazaxıstanın sabiq prezidenti Nursultan Nazarbayevin xalqa müraciətinə münasibət bildirib:
“Beynəlxalq aləm və ətraf ölkələr Qazaxıstanın keçmiş prezidenti Nursultan Nazarbayev haqqında günlərdir məlumat əldə etməyə çalışırdı. Müxtəlif versiyalar səslənirdi: “xarici qaçıb”, “evindədir”, “xəstədir”, “ev həbsindədir” və b. Rusiya Liberal Demokrat Partiyasının Kremlə bağlı lideri Vladimir Jirinovski “Nazarbayev ölüb və onu torpağa tapşırıblar” sərsəmləməsindən sonra Qazaxıstanın hazırkı Prezidenti Tokayev xələfini gün üzünə çıxarmağa qərar verdi.
Nursultan Nazarbayevin internetdə yayımlanan nitqi böyük ehtimalla Tokayevlə razılaşdırılmışdı. Çünki Tokayev son günlər Nazarbayev irsini yox etməyə çalışsa da, elbaşı hazırkı prezidentin siyasətini dəstəklədiyini ifadə etdi. Yaşlı və gücsüz Nazarbayevin başqa alternativi var idimi? Ancaq daima rus dilində danışan Tokayevin qarşılığında Nazarbayevin ana dilində xalqına müraciət etməsi fikri ayrılığının varlığını ortaya qoydu”.
Elxan Şahinoğlu əlavə edib ki, bununla Nazarbayevin sağ olduğu təsdiqləndi, ancaq Tokayev “Nazarbayev klanı”nı zəiflətməkdə davam edəcək: “Tokayevlə Nazarbayev arasında razılaşma yalnız ikincinin videformatda xalqa müraciətində hakimiyyəti dəstəkləməsiylə bağlı olub. Başqa razılaşmanın varlığı ehtimalı azdır. Tokayev özünü qorumalı və hakimiyyətini gücləndirməlidir, bunun yolu isə baş verənlərə görə məsuliyyəti Nazarbayev və onun yaxınlarına üzərinə yönəltməkdir”.
Yada salaq ki, dünən Elbaşı Nursultan Nazarbayev uzun müddətdən sonra ilk dəfə vətəndaşlara xitabən videomüraciət ünvanlayıb. O, indi Qazaxıstanın paytaxtında olduğunu, istirahət etdiyini və heç yerə getmədiyini bildirib. Elbaşı vurğulayıb ki, 2019-cu ildə prezident səlahiyyətlərini Kasım-Jomart Tokayevə təhvil verib və həmin vaxtdan təqaüdçüdür.
Onu da bildirək ki, Qazaxıstan xarici işlər naziri Muxtar Tleuberdi Nazarbayevin iğtişaşlarda əli olub-olmamasını istintaqın göstərəcəyini deyib: “Düşünmürəm ki, Nursultan Nazarbayev və onun qohumlarının ölkədəki iğtişaşlarda əli var, lakin son nəticəni istintaq göstərəcək”.
