“Çin Rusiyanın Ukraynadakı müharibə təcrübəsini öyrənir. Bu təcrübədən Tayvana qarşı öz “hibrid savaşı” strategiyasını yaratmaq üçün istifadə etmək istəyindədir. O cümlədən pilotsuz təyyarələrdən istifadə və psixoloji təzyiq yaratmaq üçün də Ukrayna təcrübəsi araşdırılır”.
YALAN.info bildirir ki, bununla bağlı Tayvanın Milli Təhlükəsizlik Bürosunun baş direktoru Çen Min-Tun danışıb.
“Bu il kommunist hərbçiləri Tayvana qarşı “hibrid savaşı”nı inkişaf etdirmək və döyüş hazırlığını gücləndirmək üçün Rusiya-Ukrayna müharibəsi təcrübəsini nümunə götürüblər”, – deyə Çen parlamentdəki çıxışında vurğulayıb.
“Avqust təlimindən sonra Çin Tayvana qarşı “boz zona” və hibrid çalışmalarını, özəlliklə də dronların istifadəsini genişləndirdi”, – deyə Çen əlavə edib. Tayvan iddia edir ki, Çinin “boz zona”dakı hərbi kampaniyası açıq döyüşlərə əl atmadan düşmənin qeyri-müntəzəm taktika ilə zəiflədilməsini nəzərdə tutur. Məsələn, Tayvanın hava hücumundan müdafiə zonasına tez-tez uçuşlar və Tayvanın hava qüvvələrini aktivləşməyə vadar etmək kimi hərəkətlər bu taktikanın özəlliklərindəndir.
Qeyd olunur ki, Tayvan da öz növbəsində Rusiya-Ukrayna müharibəsinin nəticələrini diqqətlə öyrənir. Bu, adanı öz ərazisi hesab edən Çin Xalq Respublikası güc tətbiq edəcəyi halda gərəkli cavab vermək məqsədi daşıyır.