Pakistan İslam Respublikası Əfqanıstanın Host əyalətinin hava limanında zəlzələdən zərərçəkənlərə yardım göstərmək üçün tibbi düşərgə açıb.
YALAN.info bildirir ki, bununla bağlı məlumatı Pakistanın Kabildəki səfirliyi yayıb.
“Düşərgə Xayber-Paxtunxva hakimiyyəti tərəfindən qurulub”, – deyə məlumatda qeyd olunub.
Xayber-Paxtunxva Pakistanın üçüncü ən böyük bölgəsidir və Xost əyalətinin yanında yerləşir.
Pakistan hadisə yerinə 19 həkimlə 3 təcili yardım maşını göndərib. Onlar yaralılara yardım edəcək və ağır xəstələri Pakistandakı xəstəxanalara göndərəcəklər.
Bildirək ki, ötən gün Əfqanıstanın Paktika və Host əyalətlərində baş verən zəlzələ nəticəsində 1 500 nəfər həlak olub. Təbii fəlakətdən 2 000-dən çox insanın zərər çəkdiyi bildirilir.
