Bu gün 2016-2017-ci illər mövsümü Azərbaycan kubokunun final qarşılaşması keçirilib.

YALAN.info Online Xəbələr və İnformasiya Saytı bildirir ki, mövsümün son oyununda Azərbaycan çempionu “Qarabağ” FK çempionatdakı rəqibi və ən yaxın izləyicisi olmuş “Qəbələ” ilə üz-üzə gəlib.

Premyer Liqanın iki ən yaxşı komandası Naxçıvanda qarşılaşıb. İlk dəfə bu şəhərdə keçirilən final Ağdam təmsilçisinin qələbəsi ilə sonlanıb.

Azarkeşlər ilk yarıda qol görməsə də, fasilədən sonra çempion rəqibini üstələyə bilib. Öncə Mahir Mədətovun qolu ilə hesabda önə keçən Qarabağlılar Ürfan Abbasovun avtoqolu ilə üstünlüyünü artırıb.

Beləliklə, 2:0 hesabı ilə qalib gələn Qarabağ Futbol Klubu Azərbaycan futbol tarixində bir neçə ilkə imza atıb. Bir müddət öncə ardıcıl 4-cü çempionluqla tarix yazan bölgə təmsilçisi kubokda da seriyasını davam etdirib.

Ardıcıl 3-cü dəfə kubok qazanan ilk Azərbaycan klubu olan Qurban Qurbanovun yetirmələri ümumilikdə 6-cı dəfə bu mükafata yiyələnib. “Qarabağ” bu göstəricidə “Neftçi”yə çatıb.

Ardıcıl 3-cü dəfə mövsümü “Qızıl dubl”la tamamlayan ağdamlılar bunu rəsmiləşdirən ilk komanda kimi Azərbaycan futbolu tarixinə düşüb. Ümumilikdə isə “Qarabağ” 4-cü dəfə belə uğur əldə etməklə, yeni rekord müəyyənləşdirib.

“Qəbələ” isə tarixində ikinci dəfə yüksəldiyi finalı yenə məğlub ayrılıb. 3 il əvvəl finalda “Neftçi”yə penaltilər seriyasında uduzan “qırmızı-qaralar” bu dəfə əsas vaxtda uduzub.

Azərbaycan Kuboku, Final (5 may 2017)

“Qarabağ” – “Qəbələ”: 2 – 0

Qollar: Mahir Mədətov, 52; Ürfan Abbasov, 68 (avtoqol)

Hakimlər: Fariz Yusifov, Vaqif Musayev, Namiq Hüseynov, Əliyar Ağayev

AFFA nümayəndəsi: Əli Hüseynov

Hakim-inspektor: Məlik Həsənov

Naxçıvan Muxtar Respublika stadionu

“Qarabağ” FK: 13. İbrahim Şehiç, 2. Qara Qarayev, 5. Maksim Medvedev, 8. Migel Markos Madera, 10. Muarem Muarem, 11. Mahir Mədətov, 14. Rəşad Sadıqov (k), 20. Riçard Almeyda, 22. Əfran İsmayılov, 25. Ansi Aqolli, 55. Bədavi Hüseynov

Ehtiyat oyunçular: 12. Şahrudin Məhəmmədəliyev, 15. Rahid Əmirquliyev, 18. İlqar Qurbanov, 21. Arif Daşdəmirov, 44. Ağabala Ramazanov, 77. Elşən Abdullayev, 91. Coşqun Diniyev

Baş məşqçi: Qurban Qurbanov

“Qəbələ” FK: 22. Dmitri Bezotosnı, 3. Voislav Stankoviç, 6. Rəşad Sadiqov, 7. Nika Kvekveskiri, 9. Sergey Zenyov, 14. Cavid Hüseynov (k), 19. Filip Ozobiç, 27. Teo Uiks, 34. Urfan Abbasov, 77. Araz Abdullayev, 88. Tellur Mütəllimov

Ehtiyat oyunçular: 33. David Pietrzikeviç, 10. Ruslan Qurbanov, 11. Asif Məmmədov, 17. Məhəmməd Mirzəbəyov, 18. Baqali Dabo, 21. Roman Hüseynov, 44. Rafael Santos

Baş məşqçi: Roman Qriqorçuk


Azərbaycan Kubokunun finalı, “Qarabağ” 2-0 “Qəbələ” – Geniş icmal 05.05.2017

1 AÇIQLAMA

  1. Qarabağdan başqa komanda yalandır. Qəbələ də pis deyil, ancaq nəysə çatışmır, bəlkə də müdafiədə stabillik

BİR CAVAB YAZ

Buyurun, açıqlamanızı yazın!
Buyurun, adınızı bura yazın