Avqustun 6-da Bakı vaxtı ilə saat 03:00-da Braziliyanın Rio-de Janeyro şəhərindəki Marakana stadionunda Rio-2016 XXXI Yay Olimpiya Oyunlarının açılışı oldu.

Azərbaycan Dövlət İnformasiya Agentliyi AZƏRTAC xəbər verir ki, təşkilatçılar açılış mərasiminin möhtəşəm olacağını vəd etmişdilər. Açılış mərasimini braziliyalı məşhur rejissor Fernando Meirelyes və prodüser Daniela Tomas hazırlayıblar. Bu mərasim üçün 300 rəqqas, 5 min könüllü cəlb olunub. Mərasimdə istifadə olunması üçün 12 min kostyum hazırlanıb. Olimpiya Oyunlarının açılış mərasiminə televiziya, internet və b. vasitəsilə toplam üç milyard insanın baxacağı bildirilir. Açılış mərasimindən bir qədər öncə Olimpiya məşəlini Pelenin alovlandırmayacağı açıqlanıb.

Azərbaycan yığma komandası XXXI Yay Olimpiya Oyunlarına öncəki olimpiadalara baxanda daha geniş tərkibdə – idmanın 18 növü üzrə 56 idmançı (57 lisenziya) ilə qatılıb. Bu, ötən Olimpiya Oyunları ilə qarşılaşdırdıqda 4 idman növü çoxdur. Ölkəmiz triatlon, kamandan oxatma, velosiped və kanoe-slalom idman növlərində ilk dəfə çıxış edir. Olimpiadada ölkəmiz adından 56 idmançıdan 36-sı ilk dəfə Olimpiya Oyunlarının iştirakçısı olacaq. İdmançıların paradında Azərbaycan bayrağını dünya çempionu, boksçu Teymur Məmmədov aparacaq. Rio-de Janeyroda Azərbaycan güləş, gimnastika və boks olmaqla, 3 hakimlə də təmsil olunur.

Bundan başqa, Azərbaycan XV Yay Paralimpiya Oyunlarında 24 idmançı ilə təmsil olunacaq. Paralimpiyaçılarımız Rio-2016-ya idmanın 6 növü üzrə 41 lisenziya qazanıb.

Rio-2016 bir sıra özünəməxsus cəhətləri ilə öncəki olimpiadalardan seçilir. Belə ki, Cənubi Amerikada ilk dəfədir Olimpiya Oyunları keçirilir. Rio-de Janeyronun dörd rayonunda – Deodoro, Barra, Kopakabana və Marakanada 17 gün davam edəcək Olimpiadada 306 yarış keçiriləcək və toplam 2102 medal sahiblərinə çatacaq. XXXI Olimpiadada rekord saytda 206 ölkədən 11 mindən çox idmançı mübarizə aparacaq. İştirakçı 206 ölkədən başqa, Olimpiya qaçqın idmançılar komandası da mübarizəyə qoşulacaq. Olimpiya bayrağı altında mübarizə aparacaq bu komandanın tərkibində 10 idmançı var. Onlardan 5-i Cənubi Sudandan, 2-si Suriyadan, 2-si Demokratik Konqo Respublikasında, biri isə Efiopiyadandır. Olimpiadaya ən çox idmançı ilə qatılan ölkə ABŞ-dır. Bu ölkə dördilliyin zirvə yarışına 554 idmançı ilə qoşulub. Okeaniya ölkəsi olan Tuvalu isə Olimpiadaya cəmi bir idmançı – 100 metr məsafəyə qaçış yarışında mübarizə aparacaq atlet Etimoni Timuani ilə qatılıb. Kosovo və Cənubi Sudan ilk dəfədir Olimpiadada çıxış edir.

XXXI Yay Olimpiya Oyunlarında atletlər idmanın 39 növü üzrə mübarizə aparacaqlar. Qolf 112, reqbi isə 92 illik fasilədən sonra yenidən Olimpiya Oyunlarının proqramına salınıb. Bütün yarışlar 37 arenada təşkil olunacaq. Braziliya hökuməti təhlükəsizlik məsələlərini ən yüksək səviyyədə təmin etmək üçün ciddi hazırlaşıb. Hökumət bu məqsədlə 55 ölkədən 85 min əməkdaş cəlb edib. Bu, London Olimpiadasındakından iki dəfə çoxdur.

Rio 2016-XXXI Yay Olimpiya Oyunlarının açılışı başlandı

Açılış Braziliyaya həsr olunan videoçarxın göstərişi ilə başlayıb. Bu videoda ölkənin təbiətini, idman ənənələrini göstərən görüntülər braziliyalı tanınmış müğənni Gilberto Gilin 1969-cu ildə bəstələdiyi musiqinin müşayiəti ilə təqdim olunub.

Marakana stadionunda quraşdırılan böyük səhnədə Olimpiya Oyunlarının əsas dəyərlərindən sayılan barışı təmsil edən görüntülər formalaşdırılıb. Sonra məşhur müğənni Paulinho da Violanın ifasında Braziliyanın dövlət himninin səsləndirilib və bu ölkənin bayrağı Marakana stadionunda qaldırılıb.

Daha sonra minlərlə projektor vasitəsilə “Həyatın yaradılışı” adlı kompozisiya təqdim olunub. Bu kompozisiyada ölkənin füsunkar təbiəti və aborigen əhalisi, portuqaliyalıların hücumu, Afrikadan kölələrin gətirilməsi, miqrant axını nəticəsində Braziliya xalqının formalaşması möhtəşəm görüntülərlə əks etdirilib. Kompozisiyanın növbəti hissəsində ölkənin inkişafı nəticəsində müasir şəhərlərin, meqapolislərin meydana çıxması parkur qrupların iştirakı ilə təqdim olunub.

Daha sonra Braziliyanın görkəmli şəxsləri haqqında elementlər göstərilib. Bu hissədə braziliyalıların təyyarənin banisi hesab etdikləri Alberto Santos-Dumontun təyyarə ilə uçuşu təsvir olunub. Braziliyalı bəstəkar Tom Jobimin nəvəsi Daniel Jobimin ifasında “İpanemalı qız” mahnısının sədaları altında səhnəyə bu ölkədən olan məşhur model Gizele Bündxen çıxıb. Sonra müxtəlif musiqi qrupları səhnədə çıxışlar ediblər və möhtəşəm atəşfəşanlıq olub.

Azərbaycan idmançıları Marakana Stadionuna girib

Atəşfəşanlıqdan sonra qlobal istiləşmə nəticəsində dəniz səviyyəsinin artması, ekoloji problemlərin artması və bundan çıxış yolları ilə bağlı videoçarx nümayiş etdirilib. Filmdə meşələrin bərpası istiqamətində Braziliyada, o cümlədən Rio-de-Janeyroda həyata keçirilən tədbirlər əks etdirilib.

Sonra komandaların paradı başlayıb. İlk olaraq Olimpiya Oyunlarını dünyaya bəxş etmiş ölkənin – Yunanıstanın idmançıları arenaya daxil olublar. Digər ölkələrin komandaları onun arxasınca əlifba sırası ilə gəliblər. Azərbaycan idmançıları Avstriyadan sonra stadiona daxil olublar.

Braziliya Milli Olimpiya Komitəsinin və Beynəlxalq Olimpiya Komitəsinin prezidentləri çıxış etdi

Komandaların paradından sonra Braziliya Milli Olimpiya Komitəsinin prezidenti Karlos Artur Nuzman çıxış edərək XXXI Olimpiadanın ölkəsində keçirilməsindən qürur duyduğunu deyib. O, müxtəlif ölkələrdən olan atletlərin idman və sülh üçün bir araya gəldiyini bildirərək Rio-de Janeyronun bu prosesə mühüm töhfə verməsindən məmnunluğunu bildirib.

Beynəlxalq Olimpiya Komitəsinin (BOK) prezidenti Tomas Bax isə çıxışında Cənubi Amerikada ilk Olimpiadaya ev sahibliyi edən Braziliyanın bu mötəbər tədbiri yüksək səviyyədə keçirmək üçün ciddi hazırlaşdığını bildirib. Hazırda dünyada ciddi gərginliklərin olduğunu deyən T.Bax on mindən çox atletin mehribanlıq şəraitində mübarizə apararaq, Olimpiya Kəndində bir yerdə yaşayaraq, eyni hisləri bölüşdüklərini diqqətə çatdırıb. O, bu baxımdan Olimpiya qaçqın idmançılar komandasının dünyada milyonlarla qaçqında böyük ümidlər oyatdığını deyib.

Olimpiya hərəkatının və həmrəyliyinin inkişafındakı xidmətlərinə görə Keniya Milli Olimpiya Komitəsinin prezidenti, ikiqat Olimpiya çempionu Kipçoqe Keinoya BOK-un ilk dəfə təsis etdiyi xüsusi mükafat təqdim olunub.

Braziliya Prezidenti vəzifəsini icra edən Mişel Temer XXXI Yay Olimpiya Oyunlarını açıq elan edib.

Olimpiya bayrağı Marakana stadionuna gətirilib və Olimpiya himni səsləndirilib.

Sonra idmançıların, hakimlərin və məşqçilərin adından Olimpiya andı içilib.

Nəhayət, 26 min kilometrlik səyahətdən sonra Olimpiya məşəli “Marakana” stadionuna gətirilib. 2004-cü il Afina Olimpiadasının bürünc mükafatçısı Vanderlei Kordeiro de Limanın XXXI Yay Olimpiya Oyunlarının məşəlini alovlandırması ilə açılış mərasimi başa çatıb. XXXI Yay Olimpiya Oyunlarına avqustun 21-də yekun vurulacaq.


Marakana Stadionunda Rio-2016 Olimpiya Oyunlarının açılış atəşfəşanlığı

BİR CAVAB YAZ

Buyurun, açıqlamanızı yazın!
Buyurun, adınızı bura yazın