İslam ölkələrində Fransa məhsullarına boykotun ölçüləri genişlənir

Dünyada COVID-19 pandemiyasının iqtisadi fəsadlarının artdığı bir vaxtda Fransa İslam dünyasının boykotu ilə qarşılaşıb. Müsəlman ölkələrinin böyük əksəriyyətində insanlar fransız məhsullarından imtina edirlər.

YALAN.info Onlayn Xəbərlər və İnformasiya Saytı bildirir ki, Fransa məhsullarının boykotu bu ölkənin Prezidenti Emmanuel Makronun oktyabrın 21-də İslama və onun Peyğəmbərinə qarşı təhqirlərlə bağlı bəyanatından sonra başlayıb. Fransa Prezidenti bədnam karikaturaların bundan sonra da dərc ediləcəyini bildirib.

E.Makronun bəyanatına cavab olaraq, İslam dünyasında Fransa məhsullarının boykotu kampaniyası başlayıb. Dünyada məşhur olan fransız brendləri –“President” və “La Vache Qui Rit” pendirləri, “Danone”, “Activia” və “Evian” süd və su məhsulları, “Peugeot” və “Citroen” avtomobilləri, “Tefal” və “Moulinex” elektronika-məişət əşyaları, habelə “L’Oréal”, “Garnier”, “Chloe”, “Chanel”, “Nina Ricci”, “Cartier”, “Lancôme”, “Lacoste”, “Louis Vuitton” şirkətlərinin geyim və ətriyyatı Yaxın Şərq və başqa regionlarda mağazalardan yığışdırılır. “Carrefour” supermarketlər şəbəkəsi də 16 ölkədə bağlanıb. Misir, Qətər və Küveytdə fransız məhsullarının mağazaların rəflərindən yığışdırılması videoları sosial şəbəkələrdə yayılıb.

İqtisadiyyat üzrə ekspertlər bildirirlər ki, boykot kampaniyası fransız şirkətləri ilə yanaşı, geniş supermarketlər şəbəkəsi, enerji, müdafiə sənayesi, moda və ətriyyat sektorlarında onlarla şərik olan Yaxın Şərq firmalarını da böyük zərərə uğradacaq. Hələ 2005-ci ildə İslam dinini təhqir edən Niderland şirkətləri analoji kampaniya nəticəsində 20 faizdən çox zərərlə üzləşmişdi.

Qeyd olunur ki, Fransa Yaxın Şərq ölkələrinə ən böyük taxıl ixracatçısıdır. Rəsmi rəqəmlərə görə, Əlcəzair fransız məhsullarını ən çox idxal edən 10, Mərakeş isə 17 ölkə sırasında yer alır. Ötən il bu müsəlman ölkələri Fransadan 2,1 milyard avro dəyərində məhsul idxal edib. Başqa İslam ölkələri də fransız məhsullarının geniş istehlakçılarıdır.

Ekspert Mahmud İbrahim qeyd edib ki, mal və məhsulların idxalı ilə yanaşı, Fransanın turizm sektoru da bu boykotdan ağır zərbə alacaq. Onun sözlərinə görə, artıq 430 beynəlxalq turizm şirkəti Fransaya səyahət üçün aviaşirkətlərə bilet sifarişini dayandırıb. Turizm sektorunun Fransanın ümumi daxili məhsulunun 8 faizini təşkil etməsi, illik 56 milyard avro gəlir gətirməsi və 2 milyon insanı işlə təmin etməsi nəzərə alındıqda, bunun fransızlar üçün fəsadlarını təsəvvür etmək olar.

Boykot kampaniyasının genişlənməsi fonunda bəyanat yayan Fransa Xarici İşlər Nazirliyi bildirib ki, müsəlmanlar fransız cəmiyyətinin önəmli bir hissəsini təşkil edir. Bəyanatda İslam aləminə boykotun dayandırılması ilə bağlı müraciət yer alıb. Ancaq bu çağırış müsəlmanlar tərəfindən rədd edilib. E.Makronun İslam dövlətlərinin başçıları ilə telefon danışıqları zamanı da sonuncular İslama qarşı hörmətsizliyin yolverilməz olduğunu vurğulayıblar.

Fransa şirkətlərinin boykot edilməsi kampaniyası Misir iqtisadiyyatına necə təsir göstərə bilər?

Şimali Afrika və Yaxın Şərqin ən önəmli ölkəsi olan Misirdə kənd təsərrüfatı, maliyyə, telekommunikasiya, avtomobil sənayesi, farmasevtika, tikinti, enerji və turizm üzrə çoxlu ortaq şirkətlər çalışır. İndi Fransanın Misirə sərmayəsinin həcmi 5 milyard avrodur, ticarət dövriyyəsi isə 3 milyard avro təşkil edir.

Fransanın Ticarət və Sənaye Palatasının Misirdəki nümayəndəsi Həsən Benhamın sözlərinə görə, Qahirə və başqa şəhərlərdə çalışan 165 Fransa şirkətində 38 min insan işləyir.

Ərəb Dövlətləri Liqasının baş iqtisadçısı Mahmud Fəth-Allah fransız məhsullarının boykotunun Misir iqtisadiyyatına elə də ciddi təsir etməyəcəyi qənaətindədir. Onun sözlərinə görə, Fransa məhsulları Misirin ümumi idxalının cəmi 2 faizinə bərabərdir. Misir mal və məhsulları isə Fransa idxalının 0,5 faizi qədərdir.

İqtisadçı əlavə edib ki, fransız brendi ilə Misirdə istehsal edilən avtomobil, məişət elektronikası və başqa məhsulların boykot edilməsi mümkün deyil, çünki onlar Fransadan gətirilmir.

Görünən odur ki, Fransa Prezidentinin məsuliyyətsiz bəyanatları fransız xalqına çox baha başa gələcək. Belə ki, İslam ölkələrində hətta öz müştərək şirkətlərinin zərərə uğraması fonunda belə boykot kampaniyası səngimək bilmir.

YALAN.info

YALAN.info Online Xəbərlər və İnformasiya Saytı Azərbaycan, eləcə də Bütün Dünyanın Siyasi, İqtisadi, İdman, Mədəniyyət və Texnologiya Yeniliklərini Yayımlayır. Hər Zaman Ən Son Yalanlardan YALAN.info-da Xəbərdar Ol!

Bu Xəbərləri də Bəyənəcəksiniz

Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir