Beynəlxalq Şahmat Federasiyası (FIDE) Ukraynaya zorakılığı dəstəkləyən rusiyalı şahmatçı Sergey Karyakini 6 aylıq bütün yarışlardan uzaqlaşdırıb.
YALAN.info bildirir ki, FIDE-nin rəsmi saytında yazılan məlumata görə, Sergey Karyakin 6 ay müddətində diskvalifikasiya olunub.
32 yaşlı qrossmeyster qurumun təşkil etdiyi hər hansı reytinqli şahmat turnirində oyunçu kimi iştirak edə bilməyəcək. Karyakin haqqında qəbul edilən qərar martın 21-dən qüvvəyə minib.
Bildirək ki, Karyakin bir müddət öncə özünün Instagram hesabında paylaşım edərək Rusiya Federasiyasının Ukraynada apardığı hərbi əməliyyatlara dəstək olub. Onun fikirlərinə görə, Rusiyalılar 8 ildir davam edən Kiyev rejiminin saysız-hesabsız gülləbaranlarından və soyqırımından əziyyət çəkib. Bundan sonra isə FİDE şahmatçıya qarşı intizam işi başladıb.
Onu da yada salaq ki, Sergey Karyakin 2009-cu ilədək beynəlxalq şahmat yarışlarında Ukraynanı təmsil edib.