“Bu komandaya qarşı oyuna hazırlaşmaq üçün bir həftə vaxtımız var idi. Bundan maksimum istifadə etmək istədik. Rəqibin oyunlarını təhlil etmişik. Onların son çempionat oyunundakı hesabı bizi aldada bilər”
YALAN.info bildirir ki, bunu “Qarabağ” Futbol Klubunun baş məşqçisi Qurban Qurbanov Bakıda İsveçrə “Sürix”inə qarşı keçirəcəkləri UEFA Çempionlar Liqasının II təsnifat mərhələsinin ilk oyunundan öncə mətbuat konfransında deyib.
50 yaşlı mütəxəssis yaxşı komandaya qarşı oynayacaqlarını bildirib: “Sürix” fərqli sistemlə çıxış edir. 90 dəqiqə meydanda diqqətli olmalıyıq. Rəqibi tam yaxından tanımırıq. Oyunun gedişində tanımağa başlayacağıq. İsveçrə çempionuna qarşı mübarizə aparacağıq. Sona 4 tur qalmış çempionluğu təmin etmişdilər. Bu da onların potensialından xəbər verir. Müdafiədə həddindən artıq diqqətli olmalıyıq. Rəqibin əks-hücumlarına da hazır olmalıyıq”.
Qurbanov rəqibin baş məşqçisi Franko Fodanın təcrübəli mütəxəssis olduğunu söyləyib: “O, uzun müddət Avstriya millisinə rəhbərlik edib. Avrokubok oyunları üçün böyük təcrübəsi var. Hiss olunur ki, öz sistemlərindən əl çəkmir. Yeni baş məşqçi həm 4-lü, həm də 5-li müdafiə sistemində çıxış edir. Avropadakı gedən oyunçuların yerini doldurmaqda çətinlik çəkmirlər. Aparıcı oyunçuları getməsəydi belə, onlara qarşı inamla çıxış edəcəkdik. Bizdə onlara rahatlıqla qalib gələcəyik düşüncəsi yoxdur. Yeni baş məşqçi bəlkə onları daha da stimullaşdırıb. Əsas qol silahları komandadan ayrılsa da, hücum potensialları böyükdür”.
Baş məşqçi braziliyalı yeni transfer Julio Romao haqqında da danışıb: “Onun vəziyyətinə bir gün baxa bildik. Bunadək Marko Yankoviçi də transfer etmişdik. Başqa bəzi mövqeləri də gücləndirməyə ehtiyac var. Gətirdiyimiz oyunçuya desək ki, Patrik Andrade kimi oynamalısan, ondansa gətirməmək yaxşıdır. Romao fərqli futbolçudur. Onun üstün cəhətlərindən yararlanmağa çalışacağıq. Bura gələn futbolçunun ustalıq səviyyəsini daha da yaxşılaşdırmağa çalışırıq. Avropadan gəlməsinə baxmayaraq, Çempionlar Liqası təcrübəsi tam başqadır. Bu turnirə uyğunlaşmaq o qədər də asan deyil”.
Təcrübəli mütəxəssis komandada arxayınlığın olmayacağını sözlərinə əlavə edib: “Çempionlar Liqasının nə dərəcədə ciddi olduğunu bilirik. Bu, bütün turnirlərdən fərqlənir. Həm gərginlik, həm fiziki, həm psixoloji yorğunluq olur. Çox istərdim ki, futbolçularım sabah əvvəlki oyundan daha yaxşısını sərgiləsinlər”.
Qurbanov sabahkı qarşılaşma üçün biletlərin çoxunun satılmasına da münasibət bildirib: “Bu, azarkeşlərin bizə olan inamını göstərir. Üstünlüyümüz odur ki, Bakıda, dogma azarkeşlərimiz qarşısında oynayacağıq. Hədindən artıq motivasiya futbolçuya pis təsir edə bilər. Ən böyük narahatlığım da budur. Sabahkı görüşdə şansları bərabər sayıram. Futbolçu azarkeş, kütlə qarşısında böyüyür. Çünki daha istəkli, bacarıqlı, məsuliyyətli olur.
İstərdim ki, çempionat oyunlarımızda da çoxlu fanatlar olsun. Kütlə qarşısında oynamaq futbolçunun məşqlərə, oyunlara yanaşmasını ciddiləşdirir. Bizim azarkeşlərimiz bir nömrədir. Ötən oyunda da bunun şahidi olduq. Hətta məğlub olsaq belə, çalışacağıq ki, azarkeşlərimiz o mübarizəni, istəyi görsünlər, razı getsinlər”.
Onu da bildirək ki, iyulun 19-da Tofiq Bəhramov adına Respublika stadionunda keçiriləcək “Qarabağ” – “Sürix” oyunu saat 20:00-da başlayacaq. Cavab qarşılaşması iyulun 27-də olacaq.
Qurban Qurbanovun baş məşqçi olduğu kollektiv İsveçrə “Sürix”ini üstələyəcəyi halda, səpələnmişlər səbətində yer alacaq və “Lüdoqorets” (Bolqarıstan) / “Şemrok Rovers” (İrlandiya) cütünün qalibi, “Ferentsvaroş” (Macarıstan) / “Slovan” (Bratislava, Slovakiya) cütünün qalibi, ya da Kiprin “Apollon” (Limassol) klubuna rəqib olacaq.
“Qarabağ” “Sürix” səddini keçə bilməsə, mübarizəni Avropa Liqasında Çempionlar Yolunda davam etdirəcək. Yalnız “Pünik” (Ermənistan) – “Düdelanj” (Lüksemburq) cütü istisna olmaqla, 8 cütdən birinin məğlub komandası potensial rəqib olacaq:
“Ferentsvaroş” (Macarıstan) / “Slovan” (Bratislava, Slovakiya)
“Dinamo” (Zaqreb, Xorvatiya) / “Şkupi” (Şimali Makedoniya)
HİK (Helsinki, Finlandiya) / “Viktoriya” (Plzen, Çexiya)
“Linfild” (Şimali İrlandiya) / “Budyo Qlimt” (Norveç)
“Jalgiris” (Litva) / “Malmö” (İsveç)
“Lüdoqorets” (Bolqarıstan) / “Şemrok Rovers” (İrlandiya)
“Maribor” (Sloveniya) / “Şerif” (Moldova)
“Makkabi” (Hayfa, İsrail) / “Olimpiakos” (Yunanıstan)
