Azərbaycan Mərkəzi Bankı 1, 5 və 50 manatlıq pul nişanlarının qorunma sistemləri və dizaynını çağdaş konsepsiya çərçivəsində ən son texnologiya və innovasiyalara uyğunlaşdırılaraq yenilənib.
Bankdan verilən məlumata görə, Azərbaycan Mərkəzi Bankı yenilənmiş dizayna və güclü qorunma sistemlərinə malik 1, 5 və 50 manatlıq pul nişanlarının 01 yanvar 2021-ci il tarixdən tədavülə buraxılmasını elan edir.
İndi tədavüldə olan 1, 5 və 50 manatlıq pul nişanları yenilənmiş pul nişanları ilə paralel olaraq dövriyyədə olacaq və tədavül vasitəsi kimi məhdudiyyətsiz istifadə ediləcək.
Bununla da yenilənmiş pul nişanlarımız özünün bədii estetik görünüşünə və qorunma səviyyəsinə görə beynəlxalq təcrübədə ən güvənli banknotlar sinfində qalmaqda davam edəcək.
Yenilənmiş 1, 5 və 50 manatlıq pul nişanlarında ən son mühafizə elementləri olaraq RollingStar Lead holoqramı (3D effektində hərəkət edən, rəngi dəyişən), möcüzəvi “Spark Live” elementi (dinamik işıq effekti saçan və rəngi dəyişən təsvirlər), su nişanı (pul nişanını işığa tutduqda Azərbaycan Respublikasının Dövlət Gerbi və uyğun nominalın rəqəmlə təsviri), görmə qüsuru olanlar üçün tanıma elementi (pul nişanlarının ön tərəfində sağ və sol kənarlarda görmə qüsuru olanlar üçün xüsusi qabarıq xətlər yerləşir ki, bu xətlərə toxunmaqla pul nişanının həqiqiliyini və nominalını müəyyən etmək olacaq), şaquli dizayn (banknot istehsalı sahəsində dünyada ən müasir trendə uyğun olaraq pul nişanlarının arxa tərəfi şaquli olaraq dizayn edilib), mühafizə sapı, mürəkkəbsiz çap, mikromətnlər və b. tətbiq olunub.
