Sloveniyada başa çatmış şəxsi Avropa Çempionatında uğurlu çıxış edərək 2023-cü ildə keçiriləcək Dünya Kubokuna vəsiqə qazanan gənc şahmatçımız Abdulla Qədimbəyli Azərbaycan Şahmat Federasiyasının mətbuat xidmətinin suallarını cavablandırıb.
YALAN.info bildirir ki, 11 turdan 7,5 xal toplayan Abdulla Qədimbəyli yarış boyu liderlər qrupunda yer alıb. Bundan başqa, turnirdə David Navara və Anton Korobov kimi güclü şahmatçılar üzərində qələbələrlə diqqət çəkib. O, qrossmeyster üzrə ikinci normativini toplayıb.
– Dünya Kubokuna vəsiqə qazanmağınız münasibəti ilə sizi təbrik edirik. Yarışdan öncə Avropa çempionatında uğurlu çıxış edəcəyinizə inanırdınız?
– Düzünü desəm yaxşı nəticə gözləmirdim. Yarışdan öncə əsas məqsəd reytinqimi artırmaq və qrossmeyster normanı yerinə yetirmək idi. Ancaq çempionata yaxşı başladım və getdikcə özümə daha çox inanmağa başladım. Reytinqimi düşündüyümdən daha çox artırmağa nail oldum. Ən əsası isə əksər şahmatçıların arzuladığı Dünya Kubokuna vəsiqə əldə etdim. Bu mənim üçün çox vacib idi.
– Sloveniyada ən çox hansı rəqibdən ehtiyat edirdin?
– Rəqibləri tanıyırdım. Daim onlarla müxtəlif yarışlarda üz-üzə gəlirik. Oyunlarını yaxşı bilirəm. Avropa çempionatı üzərimdə daha çox işləməyə kömək edəcək. Oyunumun mənfi və müsbət məqamlarını daha yaxından izlədim.
– Ən çətin oyun hansı turda oldu?
– Qara fiqurlarla turnirin reytinq üzrə ikinci şahmatçısı Anton Korobovla mübarizə aparmaq çətin idi. Öz variantımı oynadım. Korobov udmaq istəyirdi. Lazımi gedişləri edərək partiyanı qələbə ilə başa vurmağı bacardım. Bu oyunu ən çətin oyun adlandırmaq olar.
– Çempionatda bütün oyunları yada salsaq ən asan partiya kimi hansını fərqləndirərsən?
– Asan deyəcəyim oyunu dəqiq bilmirəm. Avropa çempionatında rahat oyunlar olmadı. Ancaq David Navara ilə oyunu fərqləndirmək olar. Turnirin reytinq favoritinə qarşı mübarizədə məqsəd təkcə qələbə deyildi, həm də baxımlı oyun göstərmək istəyirdim. Nəticədə gözəl oyun alındı, həm də qələbə qazandım. Düşündüyüm taktikanı həyata keçirdim. Müəyyən mənada rahat alındı. Oyundan və nəticədən razı qaldım.
– Yarışın əvvəlindən ilk üçlükdə qərarlaşmışdın. Hansı səbəbdən medal qazanmaq olmadı?
– İkinci turdan sonra ilk üçlükdə qərarlaşmışdım. Son tur ərəfəsində liderlər qrupunda idim. 7 tur liderlər sırasında mübarizə apardım. Reytinqimə görə yüksək nəticə göstərdim. Rəqiblərim 2600 reytinqli şahmatçılar idi, mənim isə əmsalım 2400-ə yaxındı. Müəyyən mənada yorğunluq özünü göstərdi. Son turlarda artıq gedişləri hesablamaqda çətinlik çəkirdim. Bəzi həmkarlarım erkən heç-heçələr etməklə güclərini son tura saxlayırdı. Mən belə etmədim, bütün oyunlarda maksimum güc nümayiş etdirməyə çalışdım. Bəlkə səbəblərdən biri bu oldu.
– Yorğunluq dedin, bəlkə fiziki hazırlıq rol oynadı?
– Fiziki hazırlığa daha çox fikir verməliyəm. Turnirdən öncə diqqət etməmişdim. Şahmat yarışları zamanı yaxşı həyat tərzi sürmək lazımdır. Məsələn, gün boyunca 1 saat qaçmaq, 2 saat idmanla məşğul olmaq və təmiz hava qəbul etmək. Mən isə daha çox kompüter qarşısında işləyirdim.
– Abdulla Qədimbəylinin yaxın gələcək üçün əsas hədəflərini bilmək istərdik.
– Hazırlıq barədə düşünürəm. Dünya Kubokuna hazırlaşmalıyam, yenilikləri öyrənməliyəm. Gələcək yarışlar barədə məlumat azdır. “Şarja Open”də iştirakım ola bilər. Əsas hazırlığımı gücləndirməliyəm. Mütəmadi olaraq günün müəyyən hissəsini şahmata ayıracam.
– Əsas milli komanda barədə düşünürsən?
– Əlbəttə əsas milli komandanı düşünürəm. Gələcəkdə yığmanın üzvü olmaq istərdim. Kişi şahmatçılardan ibarət millimiz çox güclüdür. Teymur, Şəhriyar və Rauf kimi şahmatçılarla eyni komandada oynamaq böyük uğur olar. Klassik şahmatda onlara qarşı oyunum olmayıb.
– Səhv etmiriksə Eltac Səfərliyə qarşı mübarizə aparmısan?
– Eltac Səfərliyə qarşı oynamışam. Klassik şahmatda 1 oyun uduzmuşam, bir heç-heçəmiz olub. Eltac kifayət qədər çətin rəqibdi.
