Bloger Aleksandr Lapşinin Azərbaycana Ekstradisiyası

Azərbaycan Respublikasının torpaqlarının bütövlüyünü danaraq, hakimiyyətin icazəsi olmadan işğal altında olan torpaqlarına, Dağlıq Qarabağ bölgəsinə səfər edərək separatçıları – terrorçuları dəstəkləyən bloger Aleksandr Lapşin Belarusdan Azərbaycana ekstradisiya edildi.

Bu, Azərbaycanın işğal altında olan torpaqlarının azad edilməsi uğrunda apardığı mübarizəsinin haqlı, ədalətli olduğunun açıq gösəricisi sayılmalıdır.

Onu da deyək ki, ikili vətəndaşlığı (İsrail və Rusiya) olan Aleksandr Lapşin dekabrın 14-də Belarusda Azərbaycan tərəfinin tələbi ilə saxlanılıb. O, haradasa bir aydır Minskdə 1 nömrəli istintaq təcridxanasında saxlanılırdı. Belarus Ali Məhkəməsi ötən gün blogerin Azərbaycana ekstradisiyası ilə bağlı qərardan verdiyi şikayətə baxıb və onu təmin etməyib.

Yada salaq ki, A.Lapşin Ermənistan Silahlı Qüvvələri tərəfindən Azərbaycan Respublikasının işğal olunmuş ərazilərində yaşayan başqa şəxslərlə qabaqcadan əlbir olub cinayət əlaqəsinə girərək “Azərbaycan Respublikasının dövlət sərhədi haqqında”, “Pasportlar haqqında” Azərbaycan Respublikası qanunlarının tələblərini kobud şəkildə pozmaqla Azərbaycanın mühafizə olunan dövlət sərhədini tələb olunan sənədsiz və nəzarət-buraxılış məntəqələrindən kənarda keçərək 2011-ci ilin aprel və 2012-ci ilin oktyabr aylarında işğal olunmuş ərazilərə girib, qanunsuz rejimin beynəlxalq səviyyədə barışsevər kimi tanıdılması üçün internet sosial şəbəkəsində özünün “http//puerrtto.livejournal.com” səhifəsində səyahət etdiyi dövlətlər arasında Azərbaycan və Ermənistanla yanaşı, Dağlıq Qarabağı da müstəqil dövlət kimi göstərməklə, həmçinin 2016-cı il aprelin 6-sı və iyunun 29-u tarixli müraciətlərində işğal olunmuş torpaqlarda qanunsuz fəaliyyət göstərən rejimin “müstəqilliyini” dəstəkləməklə Azərbaycan Respublikasının beynəlxalq səviyyədə tanınmış ərazi bütövlüyünün parçalanmasına yönələn açıq çağırışlar edib.

A.Lapşinin hərəkətlərində dövlət əleyhinə yönələn açıq çağırışlar və dövlət sərhədini qanunsuz olaraq keçmə əməllərinin tərkib əlamətləri olduğundan Baş Prokurorluğun Ağır Cinayətlərə Dair İşlər üzrə İstintaq İdarəsində fakta görə, Azərbaycan Respublikası Cinayət Məcəlləsinin 281.2-ci (dövlət əleyhinə yönələnaçıq çağırışlar) və 318.2-ci (Azərbaycan Respublikasının dövlət sərhədini qanunsuz olaraq keçmə) maddələri ilə cinayət işi başlanraq, barəsində dövlətlərarası axtarış elan edilmişdi.

Aleksandr Lapşin

O, Belarus Respublikası hüquq-mühafizə orqanlarının keçirdiyi tədbirlər nəticəsində saxlanılmışdı. 

Azərbaycanın Xarici İşlər Nazirliyi bundan öncə ölkənin işğal olunmuş ərazilərinə qanunsuz səfərlə bağlı olaraq A.Lapşinin adını “arzuolunmaz şəxslər” siyahısına salmışdı.

Ümumiyyətlə, Azərbaycan XİN ölkənin işğal altında olan torpaqlarına qanunsuz səfər etdikləri üçün xarici ölkələrin 623 vətəndaşını, o cümlədən 180 əcnəbi jurnalisiti “arzuolunmaz şəxslər” siyahısına salıb. Jurnalistlərin çoxu Litva, Yaponiya və Avstriya vətəndaşlarıdır. Azərbaycanın icazəsi olmadan Dağlıq Qarabağa daha çox ABŞ, Almaniya, Rusiya, Fransa, İtaliya və Ukrayna vətəndaşları səfər ediblər.

“Arzuolunmazlar”dan 20-si ötən il ermənilər və onların havadarları tərəfindən aldadılaraq, işğal altında olan Azərbaycan torpaqlarına qanunsuz aparıldıqlarını etiraf edib və rəsmi şəkildə üzr istəyiblər. Bundan sonra həmin şəxslər “qara siyahı”dan çıxarılıb.

Heç şübhəsiz, rəsmi Bakı işğal altında olan torpaqlarına səfəri qadağan etmir, bunun üçün ilk növbədə Azərbaycanın suveren hüquqlarına hörmət olunmasını tələb edir. “Euronews”, “Al-Jazzera”, Polşa televiziyası və başqaları belə davranıb.

Deməli, Azərbaycan tərəfi bu məsələdə söz və düşüncə azadlığına sayğı göstərib.

Azərbaycanın Dağlıq Qarabağ bölgəsinə icazəsiz gedənlərin çoxunun ATƏT-in Minsk qrupunun üzv və həmsədr ölkələrinin vətəndaşı olması təəssüfləndirici və təəccübləndirici haldır.

Lapşın kimilərin Azərbaycanın işğal altında olan torpaqlarında özlərini arxayın aparmasının səbəblərindən biri də həmin dövlətlərin münaqişənin həllinə tutduqları mövqe ilə bağlıdır.

Lapşinin təhvil verilməsi Dağlıq Qarabağın işğaldan azad edilməsində Azərbaycanın mübarizəsinin bütün hallarda ədalətli olduğunu təsdiqləyir. Azərbaycan ordusunun zabiti Ramil Səfərovun Macarıstandan ekstradisiya olunması, aprel döyüşləri fərqli hadisələr olsa da, mahiyyət etibarilə eynidir. Ermənistan və işğalı dəstəkləyənlər Azərbaycan torpaqlarından çıxmalıdırlar. Onlar Dağlıq Qarabağda qaldıqları müddətdə Lapşin kimilər Azərbaycanın qanunları qarşısında cavab verəcək, milli hisslərlə oynayan erməni cəzasız qalmayacaq, Ermənistanın işğalçı əsgər və zabitlərinin isə həmin torpaqlardan ölüləri daşınacaq.

Azərbaycan Prezidenti İlham Əliyevin dəfələrlə bəyan etdiyi fikri də burada xatırlatmaq yerinə düşər: “Azərbaycan torpağında ikinci erməni dövlətinin qurulmasına biz heç vaxt imkan verməyəcəyik. Bir daha demək istəyirəm ki, Ermənistan indiki reallıqları və Azərbaycanın artan siyasi çəkisini, iqtisadi gücünü nəzərə alsa, düzgün addım atsa, işğal edilmiş torpaqlardan çıxsa, o zaman bu gün Dağlıq Qarabağda yaşayan ermənilərə də xidmət etmiş olar. Əgər bunu anlamasa və işğalçı siyasətini davam etdirsə, o zaman Ermənistan üçün, Dağlıq Qarabağ üçün nəticələr çox acı ola bilər”.

Odur ki, Lapşinin Azərbaycanda ədalət mühakiməsinə cəlb olunması hadisəsi həm də rəsmi Bakının bu istiqamətdə apardığı siyasi-diplomatik və hüquqi fəaliyyətinin uğurudur.

Başqalarının əlində oyuncaq olduqlarını anlayıb, Azərbaycan torpaqlarındakı işğalçı istək və hərkətlərdən əl çəkməkdənsə, Ermənistan ictimaiyyəti yenə haray-həşir qoparmaqdadır.

İşğalçı damğası üzərində olan ermənilər ayıblarından utanaraq susmaq əvəzinə Lapşin məsələsində də özlərini çox gülüc və yersiz aparırlar.

Bu ölkənin tanınmış, hakimiyyətyönlü politoloqu Stepan Safaryan Ermənistanın Belarusdakı səfirini, yaxud ölkəsinin Avropa Şurası Parlament Assambleyasındakı nümayəndələrini, dövlət məmurlarını tənqid edərək, onları fəaliyyətsizlik və acizlikdə günahlandırıb.

Müxalifətdə olan “İrs” Partiyasının sözçüsü Davit Sanasaryan isə Lapşinin təhvil verməsini belə açıqlayıb: “10:0 hesabı ilə Azərbaycan Ermənistanı darmadağın etdi. Bundan sonra heç bir əcnəbi Dağlıq Qarabağa səfər etməyəcək”.

Əslində bu belə də olmalıdır. Dağlıq Qarabağa Azərbaycan tərəfinin rəsmi icazəsi olmadan heç bir əcnəbi səfər etməməlidir. Ancaq təəssüf ki, bir çoxları ölkəsinin nüfuzundan sui-istifadə edərək bu sayaq addımları atır. Onlara cavab isə Lapşin gətirildiyi kimi olur. Halbuki hərəkətlərindən utanmayan blogeri elə arxayın salıbmışlar ki, o, Azərbaycanın “arzuolunmazlar”ı siyahısında birinci yerdə olmaq istədiyini arzulamış, sosial şəbəkədə qürrələnərək belə yazmışdı: “Azərbaycan qanunlarını yenidən pozmaq üçün 150 dollarım çatmır. Ora yenidən getmək üçün sponsor axtarıram”.

Odur ki, bir az ritorik olsa da, Dağlıq Qarabağın işğal edilməsində əli olanları istər-istəməz Lapşinin vəziyyətində olması göz önündən keçdi. Onun yerində Azərbaycanın xəyanətkar vətəndaşları, Ermənistanın keçmiş prezidenti Robert Koçaryan, indiki başçısı Serj Sarqsyan və daha kimlərin olması arzu ediləndi.

Beləliklə, Rusiya və İsrail vətəndaşı olan Lapşin qanunları pozduğundan Azərbaycanın ədalət mühakiməsi qarşısında cavab verəcək. Onda təbii sual yaranır: sıradakı kimdir? Azərbaycanın ərazi bütövlüyünə daha kim sayğısızlıq etmək istəyir? Onu da vurğulayaq ki, saxtakarcasına hüququn aliliyindən danışıb, lapşinləri müdafiə edənlər elə özləri qanunları pozur, əsl mahiyyətlərini göstərirlər.

Qaynaq: Sədrəddin İsmayılov, Report İnformasiya Agentliyi

Buna Oxşar Xəbərlərdən:

YALAN.info

YALAN.info Online Xəbərlər və İnformasiya Saytı Azərbaycan, eləcə də Bütün Dünyanın Siyasi, İqtisadi, İdman, Mədəniyyət və Texnologiya Yeniliklərini Yayımlayır. Hər Zaman Ən Son Yalanlardan YALAN.info-da Xəbərdar Ol!

Bu xəbəri də oxuyun

Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir