26 yanvar 2017-ci il tarixdə Azərbaycan hökuməti, “Cənub Qaz Dəhlizi” (CQD) QSC və Asiya İnfrastruktur İnvestisiya Bankı (AİİB) arasında Trans-Anadolu Təbii Qaz Boru Kəməri (TANAP) layihəsinin dəstəklənməsi məqsədilə kredit ayrılması ilə bağlı anlaşma imzalanıb.

YALAN.info Online Xəbərlər və İnformasiya Saytı Reporta qaynaqlanaraq xəbər verir ki, 600 mln. ABŞ dolları məbləğində olan kredit sazişini CQD-nin baş direktoru Əfqan İsayev və AİİB-in İnvestisiya əməliyyatları Departamentinin baş direktoru Teravaninton Supi (Teravaninthorn Supee), kredit anlaşması ilə bağlı zəmanət sazişini isə Azərbaycan hökuməti adından maliyyə naziri Samir Şərifov, AİİB-in adından Teravaninton Supi imzalayıblar.

Ə.İsayev bildirib ki, Cənub Qaz Dəhlizi layihəsinin həyata keçirilməsi üçün beynəlxalq maliyyə qurumları ilə sıx əməkdaşlıq nəticəsində əldə edilmiş uğurlar beynəlxalq müstəvidə Azərbaycan tərəfindən görülən işlərə inam və dəstəyi nümayiş etdirir. CQD-nin baş direktoru qeyd edib ki, hazırda bir sıra Avropa maliyyə institutu da danışıqların intensivləşməsi ilə maliyyələşdirmədə öz maraqlarını təsdiqləyib: “Prezident İlham Əliyev öz çıxışlarında daim vurğulayıb ki, layihə təkcə Azərbaycan üçün deyil, Avropa və regionun enerji təhlükəsizliyi üçün xüsusi önəm daşıyır və məhz Azərbaycanın liderliyi hesabına icra edilir. Cənub Qaz Dəhlizi layihəsinin məqsədi “Şahdəniz” qaz-kondensat yatağının tammiqyaslı işlənməsi (ŞD-2), bu zaman hasil ediləcək təbii qazın genişləndiriləcək Cənubi Qafqaz Qaz Boru Kəməri (CQBK) və yeni tikiləcək TANAP və Trans-Adriatik Boru Kəməri (TAP) vasitəsilə Türkiyə və Cənubi Avropaya ixracını təmin etməkdir. Layihədə iştirak edən bütün ölkələr üçün Cənub Qaz Dəhlizinin vacibliyini nəzərə alaraq, bir sıra beynəlxalq maliyyə institutu bu layihəni dəstəkləyir”.

CQD-nin baş direktoru Cənub Qaz Dəhlizi layihəsinin iqtisadi və kommersiya cəhətdən də çox səmərəli olduğunu qeyd edərək, bu istiqamətdə görülmüş işlər barədə də məlumat verib. Onun sözlərinə görə, QSC tərəfindən Cənub Qaz Dəhlizi layihəsi üzrə 2014-2019-cu illər üçün ümumi tələb olunan təqribən 11,9 mlrd. dollar məbləğində vəsaitdən indiyədək 6,3 mlrd. dollar hissəsi, yəni təqribən 50%-i icra edilib. O deyib ki, bu vəsaitin ötən ildə təqribən 2 mlrd. dolları xərclənib: “Layihə çərçivəsində “Şahdəniz” qaz-kondensat yatağının tammiqyaslı işlənməsi üzrə görüləcək işlərin (ilk qazın hasilatına dair) 87,9%-i, Cənubi Qafqaz Boru Kəmərinin genişləndirilməsi (CQBKG) üzrə işlərin 74,5%-i, TANAP-ın inşası üzrə işlərin 59,3%-i, TAP-ın inşası üzrə işlərin 31,8%-i icra edilib. İnşaat işləri uğurla davam etdirilir.”

Qeyd edək ki, “Cənub Qaz Dəhlizi” QSC Azərbaycan Prezidentinin “Şahdəniz qaz-kondensat yatağının istismarının ikinci mərhələsi və Cənub Qaz Dəhlizinin yaradılmasına dair digər layihələrlə bağlı bəzi tədbirlər haqqında” 25 fevral 2014-cü il tarixli, 287 nömrəli sərəncamı əsasında yaradılmış və səhmlərinin 51%-i dövlət mülkiyyətində olmaqla İqtisadiyyat Nazirliyinə, 49%-i isə Azərbaycan Respublikası Dövlət Neft Şirkətinə (SOCAR) məxsus olan qapalı səhmdar cəmiyyətidir.

Azərbaycanın da təsisçi-üzvü olduğu Asiya İnfrastruktur İnvestisiya Bankı 100 mlrd. dollar nizamnamə kapitalı ilə Asiyada enerji, nəqliyyat, şəhərsalma, su təchizatı, logistika, telekommunikasiya, kənd təsərrüfatı, ətraf mühit və başqa sahələr üzrə infrastruktur layihələrini maliyyələşdirir.

BİR CAVAB YAZ

Buyurun, açıqlamanızı yazın!
Buyurun, adınızı bura yazın